Tensonet me Turqinë, kryeministri grek njofton për një riorganizim të forcave të armatosura dhe blerje armësh

Kryeministri grek, Kyriakos Mitsotakis, njoftoi sot një program të madh të blerjeve të armëve dhe një riorganizim të forcave të armatosura të vendit, ndërkohë që tensioni rritet me Turqinë në Mesdheun Lindor.

Mitsotakis theksoi se Greqia do të blinte 18 avionë luftarakë me prodhim francez “Rafale” si dhe anije dhe helikopterë ndërkohë që do të rekrutojë 15 000 ushtarë shtesë dhe do të financojë më shumë industrinë e saj të mbrojtjes.

“Ka ardhur koha të riforcojmë forcat tona të armatosura (…) Bëhet fjalë për një program të rëndësishëm që do të formojë një mburojë kombëtare”, deklaroi kryeministri grek në një fjalim në Selanik, në veri të Greqisë.

Ai theksoi se ky program do të mundësojë krijimin e mijëra vendeve pune.

Ministri turk i Punëve të Jashtme, Mevlut Çavushoglu, theksoi dje se vendi i tij priste që Bashkimi Europian të vepronte si një “ndërmjetës i ndershëm” në rajonin e Mesdheut Lindor.

Greqia ka kontestuar eksplorimin e tanishëm energjetik të Turqisë në Mesdheun Lindor, duke u përpjekur të bllokojë territorin detar turk bazuar në ishuj të vegjël pranë bregdetit turk. /ATSH/