Trembëdhjetë persona janë vrarë në një sulm ajror izraelit në dy kampe refugjatësh në Gazën qendrore, sipas ministrisë së shëndetësisë të territorit.
Siç raportohet, në mesin e të vdekurve janë një grua dhe tre fëmijë në kampet e refugjatëve Nuseirat dhe Bureij.
Sulmi pason një sulm të ngjashëm në Nuseirat në fillim të kësaj jave, në të cilin u vranë shtatë persona, përfshirë një grua shtatzënë.
Bëhet e ditur se edhe babai i foshnjës u plagos në të njëjtën goditje, por mbijetoi, shkruan euronews, përcjell Telegrafi.
Ndryshe, ky sulm vjen ndërsa bisedimet për armëpushim vazhdojnë, ku ndërmjetësit ndërkombëtarë vazhdojnë të shtyjnë një marrëveshje me faza midis Izraelit dhe Hamasit, e cila do të shihte fundin e luftimeve dhe lirimin e të paktën 120 pengjeve në Gazë.
Ndërkohë, Gjykata Ndërkombëtare e Drejtësisë e Kombeve të Bashkuara në Hagë lëshoi një opinion se prania e Izraelit në territoret e pushtuara palestineze është e paligjshme, duke thënë se Izraeli nuk mund të pretendojë sovranitet në territore dhe po pengon të drejtën e palestinezëve për vetëvendosje.
Në një veprim të paprecedentë, gjykata bëri thirrje për t’i dhënë fund ndërtimit të vendbanimeve dhe kërkoi që vendbanimet ekzistuese në Bregun Perëndimor dhe Jerusalemin lindor të hiqen.
Izraeli nuk dërgoi një ekip ligjor në seancat dëgjimore, por paraqiti komente me shkrim, duke thënë se pyetjet e bëra në gjykatë nuk adresonin shqetësimet e sigurisë izraelite. /Telegrafi/