Të paktën katër të vdekur dhe disa të tjerë të lënduar pasi një zjarr ka përfshirë një shtëpi të të moshuarve në Gjermani

Një zjarr i madh ka përfshirë një shtëpi të të moshuarve në Gjermani, duke vrarë të paktën katër dhe duke plagosur dhjetëra të tjerë.

Sipas mediave të huaja, përcjell Telegrafi, rreth orës 5 të mëngjesit të sotëm, departamenti i zjarrfikësve në Qualburg, Bedburg Hau në shtetin North Rhine-Westphalia të Gjermanisë, iu përgjigj raporteve për një zjarr në këtë ndërtesë.

Deri në orën 7:30 të mëngjesit, prania e policisë dhe e brigadës së zjarrfikësve ishte ende e madhe, raportuan mediat lokale.

Departamenti i zjarrfikësve tha se ata duhej të kryenin një shpëtim të guximshëm, në të cilin disa nga dritaret duhej të thyheshin për të arritur tek banorët e bllokuar brenda.

Por flakët ishin përhapur aq shumë në ndërtesën dykatëshe, saqë në disa prej zonave nuk mund të kishte qasje.

Mësohet se viktimat kanë jetuar në këto hapësira.

Raportet thonë se 32 nga dhomat e shkatërruara tani janë të pabanueshme.

Disa banorë u trajtuan për lëndime të lehta në vendin e ngjarjes, ndërsa të tjerët u dërguan me urgjencë në një spital lokal për trajtim urgjent.

Një person ndodhet në gjendje kritike për jetën ndërkohë që të plagosur rëndë kanë mbetur edhe një zjarrfikës dhe një oficer policie.

Operacioni përfshinte evakuimin e të 46 banorëve të shtëpisë së të moshuarve.

Për momentin nuk dihet se cili ishte shkaktari i zjarrit. /Telegrafi/