Të gjitha fushat që Trump mori vendime që në ditën e tij të parë të kthimit në detyrë si president i SHBA-së

Donald Trump nënshkroi një sërë urdhrash ekzekutivë pasi bëri betimin si president të hënën, duke synuar të zbatojë shpejt agjendën e tij.

Këto përfshinin shpalljen e një gjendjeje të jashtëzakonshme kombëtare në kufirin SHBA-Meksikë, urdhërimin për rinisjen e ndërtimit të murit kufitar dhe shfuqizimin e programeve të diversitetit në agjencitë federale, transmeton Telegrafi.

Pas një tubimi festiv në qendër të Washington-it, Trump nënshkroi disa urdhra në Shtëpinë e Bardhë që lidheshin me emigracionin, përfshirë një direktivë për t’i dhënë fund shtetësisë së atyre që lindin nga prindërit emigrantë pa dokumente.

Shtetësia është kuptuar si e garantuar nga Amendamenti i 14-të i Kushtetutës së SHBA-së, i cili thotë: “Të gjithë personat e lindur ose të natyralizuar në Shtetet e Bashkuara dhe që i nënshtrohen juridiksionit të saj, janë qytetarë të Shteteve të Bashkuara”.

Demokratët dhe disa grupe ligjore janë zotuar ta sfidojnë në gjykatë çdo përpjekje të Trump-it, për të hequr shtetësinë.

“Me këto veprime, ne do të fillojmë rikthimin e plotë të Amerikës dhe revolucionin e arsyes së përbashkët. Gjithçka ka të bëjë me arsyen e përbashkët”, tha Trump në fjalimin e tij të inaugurimit.

Ai gjithashtu përmbushi një premtim duke nënshkruar një urdhër që i jepte platformës kineze të mediave sociale TikTok më shumë kohë për t’u shitur te një kompani me bazë në SHBA.

Urdhri i parë që Trump nënshkroi para një turme në arenën Capital One, revokoi rreth 80 urdhra ekzekutivë të firmosur nga ish-presidenti Joe Biden. Ai gjithashtu nënshkroi një ngrirje të rregulloreve të reja dhe një ngrirje të punësimeve në sektorin federal. Gjithashtu, Trump tërhoqi — përsëri SHBA-në nga marrëveshja klimatike e Parisit.

Urdhrat janë pjesë e një plani të gjerë që pritet të përfshijë mbi 50 pika, pasi ai synon një fillim të shpejtë për mandatin e tij të dytë në Shtëpinë e Bardhë.

Rishikimi i emigracionit

Urdhrat e tjerë ekzekutivë të Trump-it mbi emigracionin rikthyen politikën e tij “Qëndro në Meksikë” nga administrata e tij e parë, për ata që kërkojnë të hyjnë në Shtetet e Bashkuara përmes Meksikës. Një tjetër urdhër caktoi kartelet dhe bandat e emigrantëve, përfshirë MS-13 dhe Tren de Aragua, si organizata të huaja terroriste.

Ministria e Punëve të Jashtme të Meksikës tha për NBC News, se Trump po e merrte këtë hap për politikën e tij “Qëndro në Meksikë” në mënyrë të njëanshme, pa marrëveshjen e vendit, çka mund të jetë një pengesë për zbatimin.

Kur u pyet nëse shpallja e bandave si terroriste nënkuptonte që forcat speciale amerikane mund të dërgoheshin në Meksikë, Trump u tha gazetarëve në Zyrën Ovale: “Gjërat më të çuditshme kanë ndodhur”.

Shpallja e një gjendjeje të jashtëzakonshme në kufi nga Trump do t’i lejonte Departamentit të Mbrojtjes të dërgonte ushtrinë dhe Gardën Kombëtare në kufi. I pyetur për rregullat e angazhimit për ushtrinë e dërguar në kufi, zyrtarët e tranzicionit të Trump-it thanë se kjo do të varej nga Departamenti i Mbrojtjes.

“Ne duhet ta vendosim vendin tonë në rrugën e duhur”, tha Trump për planet e tij mbi emigracionin të dielën në një tubim për mbështetësit.

“Deri në perëndimin e diellit nesër, pushtimi i kufijve tanë do të ketë marrë fund dhe të gjithë ata që kanë kaluar kufirin në mënyrë të paligjshme, në një formë ose në një tjetër, do të jenë në rrugën për t’u kthyer në shtëpi”, shtoi ai.

Shfuqizimi i nismave për diversitetin

Jo të gjithë urdhrat ekzekutivë kishin të bënin me kufijtë dhe emigracionin. Të tjerët synuan nismat për diversitetin, barazinë dhe përfshirjen brenda qeverisë federale.

“Ne do të krijojmë një shoqëri që është e verbër ndaj racës dhe e bazuar në meritokraci”, tha Trump në fjalimin e tij të inaugurimit.

Një urdhër tjetër përcakton se politika e Shteteve të Bashkuara është të njohë dy gjinitë — mashkull dhe femër — përfshirë në të gjitha dokumentet qeveritare, si pasaportat dhe vizat.

Në vitin 2022, administrata Biden lejoi qytetarët amerikanë të zgjidhnin shenjën gjinore “X” në pasaportat e tyre.

Urdhri i ri gjithashtu ndalon përdorimin e fondeve të taksapaguesve për kujdesin shëndetësor për ndërrimin e gjinisë.

Reforma dhe shkurtimet për punonjësit qeveritarë

Siç pritej, Trump nënshkroi një urdhër për krijimin zyrtar të Departamentit të Efikasitetit të Qeverisë (DOGE), i cili ka për mision shkurtimin e shpenzimeve qeveritare.

Në nëntor, Trump kishte njoftuar se DOGE do të drejtohej nga miliarderi Elon Musk dhe Vivek Ramaswamy. Megjithatë, burime të njohura me mendimin e tij i thanë NBC News të hënën, se Ramaswamy nuk do të ishte i përfshirë, pasi do të përqendrohej në kandidimin për guvernator të Ohios.

Ky urdhër u sfidua menjëherë në tri padi që pretendojnë se departamenti i paformalizuar i qeverisë, shmang rregullat e transparencës dhe ligje të tjera.

Në agjendën e Trump-it ishte gjithashtu një urdhër që rikthente “Schedule F”, një urdhër ekzekutiv që heq mbrojtjet e punës për zyrtarët jo-politikë të karrierës në role politike në burokracinë federale. Ky veprim e bën dukshëm më të lehtë për një president të pushojë nga puna këta punonjës. Ky urdhër mund të prekë potencialisht mijëra punonjës.

Një urdhër tjetër kërkon që më shumë punonjës federalë të kthehen në punë me prani fizike.

Energjia

Trump gjithashtu nënshkroi urdhra ekzekutivë që synonin të nxisnin prodhimin amerikan të energjisë, i cili është tashmë në nivele rekord. Një urdhër shpallte “gjendje emergjence kombëtare të energjisë”, për të reduktuar burokracinë dhe për të lejuar më shumë shpime, ndërsa një tjetër do të lejonte prodhim më të madh energjie në Alaskë.

Ndryshimet në emra dhe siguri kombëtare

Trump gjithashtu nënshkroi një urdhër që ndryshonte emrin e malit Denali në Alaskë, duke e rikthyer në Mount McKinley. Ai nënshkroi gjithashtu një urdhër për të ndryshuar emrin e Gjirit të Meksikës në “Gjiri i Amerikës”.

Një urdhër tjetër lejonte stafit të zgjedhur nga Zyra e Këshilltarit të Shtëpisë së Bardhë, të merrnin menjëherë certifikatat e sigurisë së lartë. Ndërkohë, Trump revokoi certifikatat e sigurisë për disa ish-zyrtarë të inteligjencës.

Sigurimi dhe revokimi i certifikatave të sigurisë

Duke përmendur një “grumbullim” në “procesimin e certifikatave të sigurisë për individët e punësuar për të punuar në Zyrën Ekzekutive të Presidentit”, Trump nënshkroi një urdhër që i jepte zyrës së këshilltarit të Shtëpisë së Bardhë të drejtën për të hartuar një listë stafi që do të merrnin menjëherë certifikata sigurie me klasifikim tepër sekret, pa kaluar nëpër procesin e zakonshëm të miratimit të certifikatave të sigurisë.

Ai gjithashtu nënshkroi një urdhër për revokimin e certifikatave të sigurisë për ish-zyrtarët e inteligjencës, të cilët kishin nënshkruar një letër paralajmëruese se historia për laptopin e Hunter Biden gjatë zgjedhjeve të vitit 2020 “kishte të gjitha shenjat klasike të një operacioni informacioni të organizuar nga Rusia”. Gjithashtu, ai revokoi certifikatën e sigurisë për ish-këshilltarin e tij për sigurinë kombëtare, John Bolton.

Bolton ishte veçuar për shkak të librit të tij mbi përvojën e punës me Trump. Urdhri argumentonte se libri, i cili ishte jashtëzakonisht kritik ndaj Trump-it, “ishte plot me informacion të ndjeshëm të marrë nga koha e tij në qeveri”.

Rekord në numrin e urdhrave ekzekutivë

Shtrirja dhe numri i urdhrave që Trump nënshkroi, tejkaluan ndjeshëm atë që ai bëri në ditën e tij të parë në detyrë në vitin 2017, kur nënshkroi vetëm një urdhër ekzekutiv që kishte në shënjestër Ligjin për Kujdesin e Përballueshëm (Affordable Care Act).

Kjo gjithashtu tejkalon numrin e urdhrave të nënshkruar nga Biden në ditën e tij të parë në detyrë. Biden nënshkroi nëntë urdhra ekzekutivë që trajtonin tema si angazhimet etike për personelin e degës ekzekutive, luftën kundër diskriminimit bazuar në identitetin gjinor dhe orientimin seksual. Ai gjithashtu nënshkroi urdhra për të anuluar direktiva të Trump-it mbi emigracionin dhe çregullimin e rregulloreve.

Biden, atë ditë në vitin 2021, nënshkroi gjithashtu shtatë veprime të tjera ekzekutive, përfshirë direktiva që synonin të ndalonin financimin e murit kufitar të Trump-it dhe të anulonin vendimin e tij për të tërhequr Shtetet e Bashkuara nga marrëveshja klimatike e Parisit.

Të hënën, Trump nënshkroi një urdhër që anulonte veprimin e Biden-it për rikthimin në marrëveshjen klimatike, si dhe urdhrat e tij mbi diskriminimin gjinor dhe angazhimet etike. Ai nisi gjithashtu procesin për të tërhequr Shtetet e Bashkuara nga Organizata Botërore e Shëndetësisë (OBSH), siç bëri gjatë administratës së tij të kaluar, para se Biden ta rikthente këtë veprim — dhe para se Trump ta anulonte sërish.

Gjithashtu, Trump anuloi disa nga urdhrat ekzekutivë të fundit të Biden-it, përfshirë urdhrin e ish-presidentit për heqjen e Kubës nga lista e shteteve sponsorizuese të terrorizmit.

Në një intervistë telefonike për moderatorin e “Meet the Press” të NBC News, Kristen Welker, të shtunën, Trump tha se planifikonte të nënshkruante një numër të madh urdhrash ekzekutivë në ditën e tij të parë në detyrë. /Telegrafi/