Tare thotë se Lazio e kërkon finalen e Ligës së Evropës

Lazio ka arritur të kalojë në çerekfinalen e Ligës së Evropës.

Skuadra nga kryeqyteti italian ka eliminuar ekipin ukrainas Dinamo Kiev.

Në ndeshjen e parë lacialët kishin barazuar 2-2 në Olimpico ndërsa në udhëtim triumfuan 0-2 për të kaluar tutje.

Drejtori sportiv i bardh e kaltërve, Igli Tare ka thënë se skuadra e tij kërkon finalen e Ligës së Evropës.

“E dinim se nuk do të ishte lehtë në Ukrainë dhe u futëm në ndeshje me të vetmin qëllim fitoren”, ka thënë Tare pas ndeshjes.

Por shqiptari nuk ka ndonjë skuadër favorite për tu përballur në çerekfinale.

“Nuk kam ndonjë preferencë se me kë dua të takohem, mjafton të jetë një skuadër që do të kemi mundësi për ta kaluar”.

Lazio e tij dëshiron të bëjë histori në Ligën e Evropës, dhe Tare kërkon që ta shijoj finalen.

“Në Ligën e Evropës dëshirojmë që të bëjmë histori. Braga vite më parë ishte një skuadër e vogël por befasoi të gjithë duke shkuar në finale, pse mos të arrijmë edhe ne diçka të tillë”, përfundoi Tare. /Telegrafi/