Superliga pa tifozë

Superliga e Kosovës gjithnjë është sfiduar nga numri i vogël i shikuesve, ndërsa krizën veç çka e kanë thelluar “Torcidat” dhe “Intelektualët”.

Të dyja këto grupe të tifozëve tashmë i kanë bojkotuar klubet e tyre. Dhe ikja e tyre nga tribunat nuk është pritur aspak mirë te futbollistët e tyre. Analistët thonë se Trepça ’89 dhe Drita duhet t’i kthejnë lojtarët e 12-të të tyre, pa të cilët futbolli s’ka lezet

Superliga e Kosovës në futboll gjithnjë është ballafaquar me mungesë të madhe të shikuesve. Dhe në vend se kjo situatë të përmirësohet, ajo vetëm sa po përkeqësohet më shumë. Këtë e konfirmon fakti se elita e futbollit kosovar tashmë ka mbetur pa dy grupet e tifozëve ndër më të mëdhatë dhe më të njohurat në vend. “Torcidat” e Mitrovicës dhe “Intelektualët” e Gjilanit e kanë bojkotuar garën kampionale, të pakënaqur me kryesitë e klubeve të tyre, Trepçës ’89, përkatësisht Dritës.

“Torcida” e pati bojkotuar 89-shin, të indinjuar me krerët e klubit për të cilët kishin thënë se nuk po i mbështesin rreth organizimeve të ndryshme. Madje, ata para disa ditëve deklaruan se nuk do të hyjnë asnjëherë në stadiumin “Riza Lushta” derisa të largohet Kryesia aktuale e Trepçës ’89, te të cilët u kishte mbetur hatri që u kanë thënë se ekipi i tyre mund të jetojë edhe pa tifozë.

Në anën tjetër, “Intelektualët” hynë në bojkot për një arsye tjetër. Të pakënaqur me rezultatet e Dritës tifozët gjilanas theksuan se nuk do të shkojnë më në stadium, në shenjë pakënaqësie me Kryesinë e Klubit, për të cilën thanë se nuk po i paguan me kohë futbollistët, me ç’rast këta të fundit po detyrohen t’i shesin ndeshjet. Gjithsesi akuzë mjaft e rëndë, por që edhe më e rëndë mund të konsiderohet mungesa e tyre në Superligën e varfër të Kosovës.

Pavarësisht raporteve mes kryesive të klubeve dhe tifozëve, mungesën e këtyre të fundit më së shumti e vërejnë futbollistët në fushë, të cilët e kanë më të vështirë të motivohen për një lojë më të mirë. Futbollisti, Samir Sahiti, i cili djersit fanellën e Trepçës ’89, thotë se mbështetja e tifozëve i nevojitet shumë ekipit të tij, i cili po e kërkon titullin e kampionit të Kosovës. “Ne kemi nevojë për mbështetjen e “Torcidave”. Nuk e di se çfarë mosmarrëveshje i kanë shtyrë ata të mos vijnë, por ata e dinë më mirë se a dëshirojnë të vijnë apo jo”, theksoi Sahiti. Në anën tjetër, edhe futbollistët e Dritës me shqetësim kanë marrë lajmin se “Intelektualët” kanë vendosur t’i bojkotojnë ndeshjet e tyre. “Ka ndodhur shumë shpesh që ata të jenë arsyeja kryesore për të fituar një ndeshje. Rasti i fundit është motivimi që kishim nga ata në ndeshjen ndaj Gjilanit, të cilën e fituam. Do të thotë që pa ta është si të jesh pa një lojtar në fushë. Ata për ne janë gjithçka”, ka theksuar Limani.

Por Limani e Sahiti dhe shokët e ekipeve të tyre nuk do të mundë ta presin përkrahjen e tyre, pa një reflektim të kryesive të Dritës dhe të Trepçës ’89.

Ish-futbollisti, tani trajneri i njohur Ismet Munishi, shpreson që Drita dhe Trepça ’89 t’i bindin tifozët e mirë të tyre t’u kthehen tribunave, pasi pa ta një lojë futbolli nuk ka lezet. Sipas tij, prezenca e tifozëve në tribuna ka rëndësi të madhe për çdo ekip dhe jorastësisht në futboll tifozët konsiderohen si “lojtari i 12-të” për çdo ekip.

“Po të mos ishin tifozët ‘Forca’ të na mbështetnin vazhdimisht nuk do t’ia kishim dalë ta fitonim titullin e kampionit sa isha në Vushtrri te Llamkos Kosova”, kujton Munishi.

“Të gjitha ato klube që kanë probleme me tifozë duhet t’i rregullojnë raportet me ta, pasi që tifozi është lojtari i 12-të. Ata janë motivimi i lojtarëve dhe kanë një rol të rëndësishëm në shkallët e stadiumit me përkrahjen që i japin ekipit të tyre të zemrës”, përfundoi Munishi.

Siç dihet, “Intelektualët” dhe “Torcidat” janë ndër grupet më të njohura dhe më të mëdhatë në Kosovë, gjë që e kanë dëshmuar nëpër vite.