Sulm me thikë në Izrael, dy të vrarë dhe dy të plagosur

Dy persona janë vrarë në një sulm me thikë në qytetin izraelit të Holon, pranë Tel Avivit, kanë thënë zyrtarët mjekësorë.

Dy të vrarët ishin një grua 66-vjeçare dhe një burrë “afërsisht 80-vjeçar”, ndërsa dy të tjerë u plagosën.

Policia tha se sulmuesi ishte një banor i Bregut Perëndimor dhe ishte “neutralizuar” në vendngjarje.

Ai u shpall i vdekur me të mbërritur në spital, shkruan CNN, përcjell Telegrafi.

Bëhet e ditur se një prani e madhe e policisë është në vendngjarje duke kryer “kërkime të gjera me helikopter dhe mjete të tjera”.

Ministri izraelit për Sigurinë e Shtetit, Itamar Ben-Gvir, vizitoi vendin e sulmit dhe përsëriti një thirrje për izraelitët “që të armatosen2.

“Unë ndaj dhimbjen me familjet e të vrarëve dhe i uroj shërim të plotë të plagosurve. Lufta jonë nuk është vetëm kundër Iranit, por këtu në rrugë. Pikërisht për këtë armatosëm popullin e Izraelit. Më shumë se 150,000 licenca për armë në tetë muajt e fundit”, tha Ben-Gvir duke u kërkuar njerëzve që të mbajnë armë pasi ajo “shpëton jetë”.

Ndryshe, ky sulm vjen pas një sulmi izraelit në Gazë i cili goditi një strehimore dhe vrau katër persona dhe plagosi të tjerë.

Izraeli së fundmi ka sulmuar edhe një shkollë ku strehoheshin persona të zhvendosur në veri të Gazës, nga i cili mbetën të vdekur 16 persona dhe 21 të tjerë u plagosën. /Telegrafi/