Statovci: Përparimit nuk i përparoi projekti i sheshit “Xhorxh Bush”, Prishtina vuan për projekte shumë më të rëndësishme

Deputetja e LVV-së Jeta Statovci është e kënaqur që është bllokuar projekti për sheshin “Xhorxh Bush”. Deputetja është shprehur kundër tenderit 18 milionë euro pasi sipas saj ka shumë prioritete të tjera janë më të rëndësishme në Prishtinë.

Komuna e Prishtinës ka pezulluar përkohësisht tenderin prej 18 milionë eurosh për ndërtimin e Sheshit “Xhorxh Bush” pas një ankese të paraqitur nga një kompani në Organin Shqyrtues të Prokurimit (OSHP).

Kjo është konfirmuar nga nënkryetari i komunës, Alban Zogaj, i cili ka bërë të ditur se ankesa lidhet me pretendime për shkelje të Ligjit për Prokurimin Publik.

Zogaj sqaroi se Komuna e Prishtinës tani është në pritje të një vendimi nga OSHP-ja, proces që mund të zgjasë disa kohë.

Ndërkohë, për këtë vendim ka reaguar deputetja e Lëvizjes Vetëvendosje (LVV), Jeta Statovci, e cila e ka cilësuar pezullimin e tenderit si një hap të mirë, por të përkohshëm.

“Anulimi i tenderit mbi 18 milionë euro për betonizimin e rrugës “Xh. Bush”, pas një vendimi skandaloz për bllokim të kësaj rruge që solli bllokadë dhe defunksionalizim total të komunikacionit, është lajm i mirë, ndonëse i përkohshëm”.

Ajo ka kritikuar projektin, duke thënë se “Përparimit nuk i përparon as ky projekt”, duke e quajtur atë “betonizim të Prishtinës” dhe një keqpërdorim të taksave të qytetarëve.

Statovci ka theksuar se anulimi i tenderit është i nevojshëm për shkak të, siç ajo e cilësoi, “skandaleve” dhe parregullsive që janë raportuar në media dhe nga shoqëria civile.

Ajo argumentoi se projekti prej 18 milionë eurosh për një “shesh betonizues lluksi” nuk është prioritet për një qytet si Prishtina, që përballet me probleme më urgjente.

Pezullimi i tenderit do të mbetet në fuqi derisa OSHP të japë vendimin e saj përfundimtar mbi këtë çështje./Telegrafi/