Gjithçka nga Samiti i Ballkanit Perëndimor në Prishtinë

Kërkojmë bashkëpunim dhe dialog institucional dhe se ky është një rast shumë i mirë, u tha në Samitin e Ballkanit Perëndimor që po mbahet në Prishtinë.

Në hyrje të panelit për sfidat e ekonomisë së rajonit, zëvendëskryeministri i Kosovës, Besnik Bislimi ka përmendur disa nga mundësitë ekonomike që ofron vendi ynë.

“Kemi mundësi për të prodhuar me kosto mjaftë atraktive. TIK është sektori me punëtorë mjaftë të aftë. Industri minerale mjaftë të zhvilluar”, tha Bislimi, përcjell Telegrafi.

Ndërsa, zëvendëskryeministri maqedonas për çështje ekonomike, Fatmir Bytyqi tha se mungesa e fuqisë punëtore nuk ka qenë e adresuar në rajonin tonë.

“Mungesa e fuqisë punëtore nuk ka qenë e adresuar në rajonin tonë. Duhet të punojmë në rindërtimin e besimit. Duhet të gjendet mënyra për të kthyer besimin drejt prosperitetit. Kërkohet që të ketë bashkëpunim ndërmjet biznesit dhe qeverisë. Vendosja e afërt duhet të ndodh”, tha Bytyqi.

Kurse drejtori ekzekutiv i Odës Ekonomike të Kosovës, Arian Zeka theksoi se duhet të ketë bashkëpunim dhe dialog institucional.

“Kërkojmë bashkëpunim dhe dialog institucional, ky është një rast shumë i mirë. Janë zbuluar dobësitë në sistem, mundësitë janë humbur, shpresoj që janë nxjerr mësimet. Është koha e trazicionit klimaterik. Tashmë është mundësi për krijimin e modelit të ri ekonomik”, tha Zeka.

“Duhet të absorbojmë më shumë kapacitete. Fatura më e lartë për biznesin do të thotë kosto më e lartë për konsumatorin. Shpresojmë që ta gjejmë modelin që të funksionon. Vendet e rajonit të gjejnë mënyrën e bashkëpunimit”, përfundoi ai. /Telegrafi/

Ish-ndihmës sekretari i Shtetit për Evropën dhe Euroazinë, Wess Mitchell ka folur për luftën në Ukrainë dhe ndikimin e saj në Ballkanin Perëndimor.

Ai ka thënë se lufta në Ukrainë është e qartë për të gjithë ne, se është eventi gjeopolitik më i rëndësishëm prej Luftës së Ftohtë.

Mitchell ka shtuar se është e mundur që Vladimir Putin të përdorë armë nukleare.

“Është e mundur që Putini të përdorë armë nukleare, çdo lloj arme duhet të jetë e ndërlidhur me ndonjë politikë të mirëfilltë. Të dy palët në konflikt duhet të fitojnë më shumë nga bisedimet sesa nga luftimet. Ukraina po fiton në teren në luftime, e nga aspekti ushtarak rusët janë duke dështuar”, tha Mitchell.

Ai theksoi se edhe nëse do të kishte ndërprerje të luftës nesër, nuk mendoj se do të kishim një marrëveshje të menjëhershme për paqe.

Reklama
Duke folur për ndikimin rus në Ballkan, Mitchell tha se Rusia gjithmonë ka provuar të shkaktoj trazira në regjion.

“Kur Rusia humb një luftë përcjellët nga dy gjëra: ndryshime në Rusi dhe në regjion. Roli rus në Ballkanin Perëndimor gjithmonë ka mbetur në kapacitetin për të shkaktuar trazira. Rusia do të kompensojë humbjet e tyre në Ukrainë duke shkaktuar jostabilitet në Ballkan”, tha Mitchell.

Ministrja e Punëve të Jashtme dhe Diasporës, Donika Gërvalla ka thënë se është e vështirë të flitet për stabilitetin dhe paqen në Evropë pa folur për 31 tetorin që është çështja e zbatimit të ligjit që është shumë me rëndësi në Kosovë.

“Ne kemi një çështje që duhet ta përfundojmë në ditët e ardhshme dhe ka të bëjë me targat e makinave. Kur të flasim për paqen dhe stabilitetin mes shumë vendeve duhet të përmendim edhe probleme të tilla teknike siç janë targat dhe kjo del nga ajo që jemi të mësuar me fqinjët tanë verior”, tha Gërvalla gjatë diskutimit në Samitin e Ballkanit Perëndimor që po mbahet në Prishtinë.

Ajo shtoi se serbët e marrin një problem të tillë teknik edhe e bëjnë çështje në vete si më të rëndësishëm.
“Gjysma e Evropës, partnerët tanë si ShBA dhe Mbretëria e Bashkuar po flasin me ne me muaj të tërë për çështjen e targave. Kjo tregon se kur nuk dëshiron të zgjedhësh probleme bazike, dëshiron të humbësh kohën me gjëra të vogla”, tha Gërvalla. /Telegrafi/

I dërguari special i Britanisë së Madhe për Ballkanin Perëndimor, Stuart Peach ka thënë se lufta në Ukrainë është duke riformuar kornizën gjeopolitike.

“Çdo kush që mendon se konkurrenca strategjike është konkurrencë për akademikët nuk është. Na nevojiten për tu përballur me këtë konkurrencë gjeostrategjike. Proceset demokratike që i përmendi kryeministri Kurti kanë rendësi, siç janë lufta kundër korrupsionit, përparimi ekonomik etj”, tha Peach, raporton Telegrafi.

Peach shtoi se duhet të jemi shumë të kujdesshëm të mos lejojmë problemet politike që të bëhen çështje superiore, duke theksuar se mbështesim procesin e atlantikut për këtë regjion e po ashtu edhe procesin e Berlinit.

“Mbështesim anëtarësimin e Kosovës në Këshillin e Evropës”, tha Peach, duke theksuar se mbështesin çdo gjë që e përmban unitetin.

Ambasadori i SHBA-ve në Kosovë, Jeff Hovenier ka thënë se SHBA-ja është shumë e përqendruar rreth Ballkanit Perëndimor, që nga vitet e 90-ta.

Ai në Samitin e Ballkanit Perëndimor, shtoi se një numër i presidentëve janë për një Evropë të bashkuar, duke u bërë prioritet që të arrihet kjo.

“Prioriteti më i lartë i ynë është integrimi i vendeve në Bashkimit Evropian, e që është në interes të vetë vendeve dhe të SHBA-së. Ne mendojmë se çdo vend që është anëtarë i BE-së është një vend më demokratik”, tha Hovenier, raporton Telegrafi.

Ambasadori shtoi se “Dëshirojmë që të kemi një integrim më të lartë ekonomik dhe duam t’iu ndihmojmë që të veprojnë përtej kufirit”

“Ne në tërë rajonin kemi shumë programe. Këtu në Kosovë kemi tri qëllime strategjike, pra ne e mbështesim Kosovën që të integrohet në vendet euroatlantike, kjo merr kohë. E dyta ka të bëjë me rritjen ekonomike dhe zhvillimin, e duhet të janë për të gjithë. Kurse e fundit, është sundimi i ligjit. Jeni një shtet që nuk e keni përvojën, si shtet i ri. Këtë janë prioritetet me logjikën evropiane”, tha Hovenier.

Ish- kryeministri i Greqisë, George Papandreu në një lidhje direkte në Samitin për Ballkanin Perëndimor, e nisi fjalimin e tij duke thur lavde ndaj kryeministrit Albin Kurti.

Papandreu tha se duhet përgëzuar Kurtin për punën që ka bërë.

“Kurti është ndër ata politikanë që beson në atë që thotë. Ka punuar shumë, dhe është e domosdoshme ta përgëzojmë për punën që ka bërë për transparencën, luftimin e korrupsionit dhe shumë tema tjera”, tha Papandreu, raporton Telegrafi.

Ai shtoi se është e rëndësishme përparimi ekonomik por edhe procesi ku jemi aktualisht lëvizjes drejt anëtarësimit në BE.

“Ëndrra perëndimore që kemi në Ballkanin Perëndimor na përfshin të gjithëve, kjo nuk është thjeshtë një ëndërr e rritjes së prosperitetit, por është ajo e një bashkëjetese në paqe, ku dëshirojmë të shohim diçka të mirë dhe jo të rrezikshme”, ka thënë Papandreou.

Ndër tjerash, ai ka bërë thirrje që shtetet e Ballkanit Perëndimor të bashkëpunojnë më shumë mes vete për integrime më të shpejta drejtë BE-së, si dhe zhvillimeve të tyre.

Ish-kryetari i Parlamentit Evropian, Martin Schulz në Samitin e Ballkanit Perëndimor, tha se në këtë botë multipolare, Evropa duhet t’i jep një përgjigje Bashkimit Evropian.

“BE-ja është e përqarë. Pjesët tjera të botës janë shumë të bashkuara. BE-ja kurrë më shumë nuk kanë pasur mundësinë që ta kenë një udhërrëfyes. Përqarja e vendeve të BE-së po e dobëson bllokun. I mbështes të gjitha vendet që dëshirojnë ta kenë një reformë”, tha Schulz.

Schulz tha se ky mosreformim i BE-së, që shmang konceptin që vendet e vogla nuk mund të reformohen, atëherë zgjerimi i BE-së në 30 apo 31 vende do të dobësojë.

“Më shumë se kurrë BE-ja duhet t’i plotësoj premtimet e veta. Kjo e shkatërron kredibilitetin e BE-së. Po të ishte Rusia demokraci, atëherë Ukraina kurrë nuk do të sulmohej dhe e njëjta po ndodh në Beograd me presidentin Vuçiq”, u shpreh Shculz.

Kryeministri i Kosovës, Albin Kurti ka folur në hapje të Samitit rajonal të Ballkanit për sigurinë, ekonominë dhe paqen që po mbahet në Prishtinë, organizuar nga The Economist.

Kurti para të pranishmëve foli për luftimin e korrupsionit në Kosovë, ku përmendi rastin Brezovica.

‘Gjyqtarë, biznismen, politikanë e të afërm të tyre ishin të përfshirë në këtë rast, ku u sukesuestruan shumë objekte të ndërtuara në atë zonë. Epoka e korrupsionit në shtet dhe mos ndëshkueshmëria e saj po i vie fundi’, tha Kurti, raporton Telegrafi.

Ai shtoi se reformat demokratike kanë ndihmuar që të shtyhet përpara progresi ekonomik në vend.

Kryeministri foli edhe për ndihmat që Qeveria e Kosovës i ka dhënë qytetarëve lidhur me përballjen me inflacionin që ka prekur botën.

Duke folur për luftën në Ukrainë, kryeministri Kurti përmendi edhe lidhjen e Serbisë me Rusinë, duke thënë se nëse Serbia do të ishte një demokraci e vërtetë, nuk do të ishte kërcënim i madh i paqes në rajonin tonë.

‘Serbia ka mbyllur sytë ndaj agresionit rus. Presidenti i Serbisë nuk ka shfaqur asnjë lloj problemi në kuptimin e nënshkrimit të marrëveshjeve me aleatin e tij rus’, ka thënë Kurti.