Simpoziumi shkencor, “Lahutarët e Sanxhakut të Pazarit të ri”

Shoqata “Kosova për Sanxhakun” me përkrahjen e Ministrisë së Kulturës mbajti sot simpoziumin shkencor “Lahutarët e Sanxhakut të Pazarit të ri”, ku u tha se do të ofrohen të dhëna të reja për pasardhësit e lahutarëve të njohur.

Kryetari i kësaj shoqate, Ismet Azizi, u shpreh se ky aktivitet shënon një hap të rëndësishëm në shkencën folkloristike, pasi është ndër simpoziumet e rralla të kësaj natyre.

Ndërsa, profesori Adem Zejnullahu, në fjalën e hapjes së këtij simpoziumi, tha se rapsodia është një nga zhanret më të rëndësishme të poezisë shqiptare popullore dhe se eposi shqiptar dhe ai boshnjak kanë ngjashmëri si në aspektin krijues, edhe në atë interpretues.

“Një numër i rapsodëve të quajtur boshnjakë, sipas të dhënave që disponojmë kanë origjinë shqiptare, të cilët kanë menduar dhe kanë kënduar shqip. Mbajtja e këtij simpoziumi ka për qëllim kryesor që të vë në spikamë gjendjen e këngës epike sot dhe në të kaluarën tek të dy popujt. Në këtë manifestim të rëndësishëm kulturor, referuesit me kumtesat e tyre do të paraqesin kontributin e tyre. Ata do të ofrojnë të dhëna të reja për pasardhësit e lahutarëve të njohur”, ka thënë Zejnullahu.

Kryesia e punës së këtij simpoziumi përbëhet nga profesorët Zymer Neziri, Sabahajdin Cena, Ismet Azizi dhe Rexhep Shkrijeli. Simpoziumi do të mbahet gjatë gjithë ditës ku do të lexohen kumtesa të shumta nga kryesia e punës dhe studiues të tjerë. /KP/