Si po ndikojnë zjarret në sezonin turistik të Greqisë?

Ndërsa mijëra njerëz janë evakuuar nga ishujt grekë të Rhodesit dhe Korfuzit, po ngriten shqetësime rreth të ardhmes së industrisë së turizmit në Greqi.

Ndërsa zjarret po përhapen në të gjithë shtetin grek, efekti në turizëm po ndihet shumë, raporton euronews.

Industria përbën një pjesë të madhe të GJDP-së së vendit, e cila vitin e kaluar ishte 18.5 për qind e ekonomisë, transmeton Telegrafi.

Lexo po ashtu Zjarrfikësit 'luftuan me zjarret' në Greqi edhe gjatë natës, digjen ferma dhe fabrika

Zjarret në ishujt e Korfuzit dhe Rhodesit kanë parë tashmë evakuime masive të turistëve. Në Rhodes, 10 për qind e kapaciteteve të hoteleve janë mbyllur në mënyrë efektive për shkak të rreziqeve si për vendasit ashtu edhe për ata që pushojnë.

Fundjavën e kaluar mbi 19 mijë njerëz, kryesisht turistë, janë evakuuar nga ishulli i madh për shkak të zjarrit. Në ishullin perëndimor të Korfuzit, 2000 njerëz u zhvendosën larg zonave.

Sa kohë mund të vazhdojnë zjarret në Greqi?

Megjithëse zjarret janë të zakonshme gjatë verës në Greqi, vala e nxehtë e Evropës – që shkakton kushte të thata – dhe erërat e forta kanë shkaktuar fillimin e shumë zjarreve në të njëjtën kohë.

“Temperatura dhe erërat i kanë ndihmuar këto zjarre. Ka shumë mundësi se këto po ndodhin shkaku i ndryshimeve të klimës”, shpjegon Dr. Mathew Jones, studiues në Qendrën Tyndall për Kërkimin e Ndryshimeve Klimatike, Mbretëri e Bashkuar.

“Koha më e ftohtë do të ndihmojë [t’i frenojë zjarret], kështu që në një masë të caktuar, shpresojmë për një ndryshim të rrjedhës së ajrit”, shtoi ai.

Lexo po ashtu Gjendet e vdekur një grua pas zjarreve në Greqi

Zjarret në Rhodes dhe Korfuz janë vetëm dy nga shumë zjarret me të cilat po lufton vendi. Zjarret po shpërthejnë edhe në pjesë të tjera të vendit si Viotia, një rajon në veriperëndim të Athinës dhe ishulli Evia në Gadishullin Atik, me 64 zjarre të reja të regjistruara në të gjithë vendin vetëm të dielën.

Temperaturat pritet të bien ndjeshëm në pjesën më të madhe të vendit ditën e premte, por pritet të rriten në Rhodes dhe Korfuz në ditët në vijim, sipas Shërbimit Meteorologjik Kombëtar Helen (HNMS).

Turistët e kujdesshëm

Në Rhodes, hotelet po e ndjejnë ndikimin e zjarreve.

“Sot, udhëtarët kanë frikë nga e panjohura, por pasi zjarri të shuhet plotësisht, turizmi do të kthehet në normalitet”, parashikon një zëdhënës i Hotel Dionysos në Ialysos, Rhodes.

Ata parashikojnë se rimëkëmbja do të jetë më e ngadaltë për pjesët e ishullit të shkatërruar nga zjarret, “kjo është në veri. Në jug, do të duhet pak më shumë kohë”.

Disa linja ajrore kanë anuluar fluturimet ose kanë ofruar rezervime alternative për destinacione të tjera në vend të Rhodesit për shkak të zjarreve.

Linja ajrore britanike Jet2 ka anuluar të gjitha fluturimet drejt ishullit deri më 30 korrik. Në mënyrë të ngjashme, kompania evropiane e udhëtimeve Tui ka ndaluar të gjitha fluturimet për në Rhodes deri më 28 korrik dhe udhëtimi në zonat e prekura nga zjarri nuk do të rifillojë deri më 30 korrik.

Tui u ka ofruar atyre që kanë vendosur të fluturonin për në Rhodes opsionin për pushime alternative pa tarifa ndryshimi dhe një rimbursim të plotë.

Gjermanët dhe britanikët përbëjnë shumicën e turistëve në ishull.

Sipas Greek Travel Pages, 20 mijë pushues gjermanë janë prekur, shumë prej të cilëve janë kthyer në Gjermani ose janë zhvendosur në vende të tjera. Ndërsa Ministria e Jashtme Britanike ka vendosur një ekip për të mbështetur operatorët e udhëtimit të sjellin turistët në shtëpi.

Lexo po ashtu Rrëzohet aeroplani zjarrfikës, vdesin dy pilotët grekë

Ministria e Jashtme e Mbretërisë së Bashkuar përditësoi të dielën këshillat e udhëtimit në lidhje me Greqinë. Ajo nuk u ka rekomanduar anulimin e pushimeve në shtetin grek, por u kërkon udhëtarëve që të informohen për gjendjen para se të rezervojnë ndonjë hotel.

Greqia mbetet e sigurt për vizitorët

Kryeministri grek, Kyriakos Mitsotakis deklaroi gjatë një seance parlamentare se zjarrfikësit duken sikur “janë në luftë” .

Por, ministrja e Turizmit Olga Kefalogianni ka theksuar se shumica e vendit, duke përfshirë ishujt e prekur, mbeten vende të sigurta për turistët.

“Si një vend mesdhetar, ne po përballemi me efektet e ndryshimeve klimatike dhe duhet t’i përgjigjemi të gjitha sfidave të reja përpara nesh”, tha Kefalogianni në një takim të martën me Organizatën Kombëtare Greke të Turizmit dhe Dhomën Helenike të Hoteleve.

Kefalogianni i përshkroi ishujt “si vende të bukura dhe destinacione të sigurta”.

Linja ajrore greke, Sky Express ka vazhduar të kryejë fluturime drejt dhe nga Aeroporti Ndërkombëtar Rhodes Diagoras.

A është prekur turizmi në pjesën tjetër të Greqisë nga zjarret dhe nxehtësia?

Ndërsa temperaturat në pjesë të Greqisë kontinentale arrijnë deri në 45 gradë Celsius, disa turistë kanë ndryshuar planet e pushimeve.

Një përdorues i Reddit ofroi një qëndrim për tre netë, të paguar për në Athinë në subreddit “Greecia Travel”, duke thënë se ata kishin ndryshuar planet e tyre për shkak të vapës së madhe.

Lexo po ashtu Imazhet satelitore tregojnë shkatërrimet e shkaktuara nga zjarret në Greqi

“Ajo tashmë ka ndikuar gjerësisht në turizmin, dhe jo vetëm në Greqi, por në të gjithë pjesën jugore të Evropës. Thjesht ka qenë shumë vapë”, tha Doug Lansky, ekspert i turizmit me bazë në Suedi, për Radion Publike Kombëtare.

Edhe pse Kefalogianni i ka siguruar vizitorët se “siguria është e para”, disa udhëtarë janë skeptikë pasi që edhe pa zjarre, ende është shumë nxehtë.

“Ka zjarre të mëdha çdo vit, por temperaturat janë ekstremisht lartë. Nuk ndihem shumë rehat, por nuk është në fazën që do ta anuloja”, tha një turist gjerman që udhëton në një ishull pranë Athinës. /Telegrafi/