Shuma milionëshe të cilën ekipi më i mirë në botë FaZe e ka fituar gjatë këtij viti

Pasi garat kanë përfunduar dhe ekipet janë në pushim të përkohshëm të verës, ekipi FaZe renditet në vendin e parë të ranglistës botërore të CS:GO, pas përfundimit të pjesës së parë të këtij viti.

Vendin e parë ekipi FaZe e siguroi në turneun e fundit, ku u përball me ekipin Na’Vi në finale të turneut IEM Cologne, ku edhe u dëshmua se cili është ekipi më i mirë për momentin.

Ndeshjen përplot emocione ekipi FaZe në fund e përmbylli me rezultat të përgjithshëm 3-2 me mapa në të mirë të tyre.

Kjo nuk është e tëra, ekipi FaZe gjithashtu u shpallën kampion të turneut më të madh të CS:GO, PGL Antwerp Major, ku përsëri e mposhtën ekipin Na’Vi në finale.

Suksese të tjera të ekipit më të mirë të botës, janë edhe turneu IEM Katowice, si dhe ESL Pro League 15, të cilat i fituan gjatë vitit 2022.

Gjatë vitit 2022, FaZe ka fituar në total 1.6 milion dollarë, duke u renditur në vendin e parë edhe sa i përket fitimeve, në vendin e dytë renditet ekipi Na’Vi me afro 680.000 dollarë. /Telegrafi/