Shteti nuk ua ndali mësimdhënësve kuotën sindikale në shtator, SBASHK-u thotë se kjo është e jashtëligjshme

Në fondin e Sindikatës së Bashkuar të Arsimit, Shkencës dhe Kulturës (SBASHK), në muajin shtator nuk u deponuan mjetet financiare nga kuota e anëtarësisë sindikale.

Kjo ndodhi pasi më 15 shtator në email-in zyrtar të SBASHK-ut dhe sindikatave të tjera erdhi një njoftim nga Thesari i Shtetit për digjitalizimin e anëtarësisë në platformën “e-Kosova”.

Disa mësimdhënës i kanë thënë Telegrafit se kuotën e anëtarësisë sindikale, që është 0.5 për qind e pagës neto, për muajin shtator u është kërkuar nga drejtoritë e shkollave që ta paguajnë ‘cash’.

Lidhur me këtë Telegrafi ka kontaktuar me nënkryetaren e SBASHK-ut, Vjollca Shala, e cila tha se digjitalizimi i anëtarësisë përmes platformës “e-Kosova” është i jashtëligjshëm.

Ajo sqaroi se mësimdhënësve u kanë kërkuar që të regjistrohen në këtë platformë, ndërsa për muajin shtator anëtarësitë e shkollave t’i mbledhin mjetet financiare dhe t’i deponojnë në xhirollogaritë e shkollave.

“Është e vërtetë që kuotën e anëtarësisë sindikale nuk e kanë ndalë për muajin shtator që është prej 0.5 për qind të neto pagës. Nuk është ndalë nga Ministria e Financave. Ata kanë kërkuar që anëtarësia të regjistrohet përmes e-Kosova. Kështu që ne kemi kërkuar nga mësimdhënësit të regjistrohen përmes kësaj platforme. Ndërsa, për muajin shtator që nuk është bërë ndalesa atëherë anëtarësia e shkollave t’i mbledhin mjetet dhe t’i deponojnë në xhirollogarinë e shkollës së vet”, u shpreh Shala.

“Me këtë platformën e-Kosova të gjithë anëtarësinë i kanë përjashtuar. Më s’ka anëtarë përveç atyre që regjistrohen në e-Kosova. Njoftimi ka ardhur me 15 shtator nga Thesari i Kosovës, që anëtarësia e të gjitha sindikatave duhet të regjistrohen në e-Kosova dhe regjistrimi është dashur të bëhet deri me 21 shtator. Pra, për të gjitha sindikatat e jo vetëm për SBASHK-un. Kjo është e paligjshme sepse në ligj nuk thuhet që anëtarësia duhet të regjistrohet përmes kësaj plaforme e-Kosova”, shtoi ajo.

Këtë nismë të shtetit e kanë kundërshtuar edhe disa sindikata tjera si Federata e Sindikatave të Shëndetësisë së Kosovës dhe ajo e Policisë së Kosovës. Sipas tyre kjo “ndërhyrje” bie ndesh me disa nene dhe paragrafe të Ligjit për Organizimin Sindikal.

Lidhur me këtë, Telegrafi ka dërguar pyetje edhe në adresë të Thesarit, por deri në momentin e publikimit të këtij artikulli, nuk ka pranuar përgjigje. /Telegrafi/