Rritet konsumi i marihuanës nga të rinjtë në Kosovë

Narkotikët dhe përdoruesit e drogës po vazhdojnë të paraqesin sfidë për institucionet e Sigurisë në Kosovë. Detyrë edhe më e rëndë po konsiderohet ndalimi i shpërndarjes drogave nëpër shkollat fillore dhe të mesme.

Nga të dhënat e poseduara, numri i konsumuesve të drogave dallon varësisht prej llojit.

Kështu ka konstatuar Policia e Kosovës në një përgjigje për lajmi.net, teksa shtojnë se numri i konsumuesve të heroinës ka rënë dukshëm, ndërsa është rritur numri i personave që konsumojnë marihuanë.

Sipas rasteve të regjistruara në polici, mosha tek të cilat më së shumti frekuenton droga, është 21 deri në 35 vite.

Kësisoj, lidhur me veprën penale të posedimit, shpërndarjes apo shitjen e paautorizuar të narkotikëve, nga periudha janar-gusht të këtij viti janë arrestuar gjithsej 1 mijë e 392 persona.

Nga 1 mijë e 487 persona të dyshuar lidhur me këtë vepër penale,  57 prej tyre janë femra.

Gjatë të njëjtës periudhë janë konfiskuar mbi 536 kilogram marihuanë, që paraqet ulje të sasisë për rreth 43 kilogramë të konfiskuar gjatë të njëjtës periudhë të vitit të kaluar.

Policia e Kosovës është angazhuar si në fushën e parandalimit ashtu edhe ne fushën operative-hetimore (luftimit) të kësaj dukurie.

Në fushën e parandalimit ka hartuar Urdhrin Operativ  “Stop drogës në shkolla” me ç ‘rast janë realizuar aktivitete në vazhdimësi për parandalimin dhe luftimin e dukurisë së drogës në shkolla dhe rreth tyre, janë realizuar kontakte me prindër, takime me ekipet për siguri, forume rinore, plane operative ne pikat kufitare dhe në Vijën  e Gjelbër dhe aktivitete të tjera në bashkëpunim me organizatat relevante qeveritare dhe OJQ. Këto aktivitete kane treguar rezultate pozitive ne parandalim dhe sekuestrim.

Kultivimi nuk është shumë i theksuar në Kosovë.

Mbjellja bëhet kryesisht nga përdoruesit për përdorim personal në sasi të vogla, me ndonjë rast ku është tentuar të kultivohet në sasi më të madhe por ekzistojnë edhe vende ku kanabisi mbin vetvetiu ( bime të egra), vende të cilat policia i ka identifikuar dhe bimët janë shkatërruar në fazën e hershme.

Për parandalimin e kultivimit policia me parë ka realizuar patrullime me helikopter ne bashkëpunim me KFOR-in dhe EULEX-in, kontrollin e lokacioneve të dyshuara me dronë, dhe shkëmbim të informatave në bashkëpunim të ngushtë me qytetarët.

Nga droga e cila hyn nga vendet tjera, në bazë të statistikave rreth 10% është e destinuar për konsumim vendor ndërsa rreth 90% për tregun e jashtëm.

Theksojmë se në mbledhjen e fundit të Qeverisë së Kosovës, kryeministri Haradinaj ka kërkuar masa konkrete nga ministri i Brendshëm, Ekrem Mustafa, hartimin e planeve operative për ndalimin e shpërndarjes së drogave nëpër shkolla.

Në kuadër të këtij plani, parashihen takime të zyrtarëve të ministrisë me komandantët e Policisë.

Lidhur me rezultatet e këtij operacionit, ministri i Brendshëm do të raportojë në Qeverinë e Kosovës.