I shpëtohet jeta 75-vjeçarit, SHSKUK: Është bërë stentimi i LM-LAD, një nga ndërhyrjet më komplekse në fushën e Kardiologjisë Invazive

Shërbimi Spitalor Klinik dhe Universitar i Kosovës ka bërë të ditur se i është shpëtuar jeta një 75-vjeçari, pas reagimit të shpejtë nga stafi shëndetësorë i QKUK-së dhe se pacientit i është bërë stentimi i LM-LAD, që sipas SHSKUK-së paraqet një nga ndërhyrjet më komplekse në fushën e Kardiologjisë Invazive.

Në njoftim thuhet se pacienti kishte shkuar në Klinikën e Kardiologjisë në QKUK, pasi kishte pësuar infarkt akut të miokardit.

Lexoni të plotë njoftimin:

Reagimi i shpejtë, me kohë dhe profesional nga stafi shëndetësorë i QKUK-së ka bërë që pacientit R.M., 75 vjeçar, t’i shpëtohet jeta dhe t’i kthehet jetës normale.

Pacienti kishte ardhur në Klinikën e Kardiologjisë në QKUK, pasi kishte pësuar infarkt akut të miokardit,  gjendje pas implantimit të CRT, Cardiomyopathy Dilatativa, Insuficiencë e avancuar kardiake, si dhe sëmundje e sheqerit.

Fillimisht pacientit i ishte bërë Koronarografia dhe  vërtetohet se ka ngushtime (stenoza) të avancuara të arterieve koronare, duke përfshirë edhe trungun e përbashkët (left main).

Për shkak të kompleksitetit së sëmundjes kardiake (zemër e dilatuar, me fraksion ejeksioni rreth 25%, me pajisje sinkronizuese të zemrës – CRT të implantuar me herët), konziliumi kardiologë- kardiokirurgë vendosi për stentimin e trungut të përbashkët (unprotected left main coronary artery disease), pasi që pacienti ka rrezikshmëri të lartë për operacion të hapur (by-pass).

Stentimi i kryer në Klinikën e Kardiologjisë të Qendrës Klinike Universitare të Kosovës, është trajtuar me sukses stentimi i LM-LAD tek pacienti 75 vjeç, dhe kjo paraqet një nga ndërhyrjet më komplekse në fushën e Kardiologjisë Invazive.

Trajtimi i tillë bëhet vetëm në qendrat e njohura të kardiologjisë invazive në botë. /Telegrafi/