Shefat ekzekutivë të kompanive në Britani të Madhe paguhen 118 herë më shumë se një punëtor

Shefat ekzekutiv në kompanitë më të mëdha britanike regjistruan rritjen më të pagave të tyre me 16 për qind krahasuar me vitin e kaluar, pasi shumica e punëtorëve në vend po vazhdojnë të luftojnë me inflacionin në rritje.

Sipas High Pay Centre, paga mesatare e një shefi ekzekutiv gjatë 2022-së ishte 3.91 milionë funta [4.58 milionë euro] nga 3.38 milionë funta [3.96 milionë euro] që ishte më 2021, duke shtuar se të ardhurat mesatare të një shefi ekzekutiv ishin 118 herë më shumë se një punëtor që merr 33 mijë funta [39 mijë euro] në vit, përcjell Telegrafi.

Kritikët i quajtën fitimet ekstreme, por disa nga firmat argumentuan se ishin në përputhje me konkurrentët.

Ky institut thotë se personi më i paguar për vitin e kaluar ishte Pascal Soriot, i cili është shefi ekzekutiv i AstraZeneca, me 15.3 milionë funta [17.93 milionë euro] në vit.

Charles Woodburn i kompanisë për siguri BAE Systems është renditur i dyti me 10.7 milionë funta [12.54 milionë euro], ndërsa shefja e Glaxo Smith Kline, Emma Walmsley ishte femra më e paguar me 8.45 milionë funta [9.9 milionë euro].

Ish-shefi i gjigantit energjetik Shell, Ben van Beurden u pagua me 9.7 milionë funte [11.37 milionë euro] dhe Bernard Looney i British Petrolum siguroi 10 milionë funta [milionë euro] brenda një viti.

Instituti, i cili analizoi pagat e shefave ekzekutivë të të gjitha kompanive në indeksin e kompanive Blue Chip të Britanisë së Madhe përmes raporteve vjetore të firmave për vitin 2022, raportoi se paga mesatare ishte më shumë se 500 mijë funta [586 mijë euro] në vitin 2021, duke vazhduar trendin e saj rritës që kur ra në 2.46 milionë funta [2.88 milionë euro] në 2020 gjatë kulmit të pandemisë COVID-19.

Megjithatë, të ardhurat nuk janë ende aq të larta sa ishin në vitin 2017, kur arritën në 3.97 milionë funta [4.65 milionë euro].

Qendra tha se hendeku midis drejtuesve të kompanisë dhe pagave të punëtorëve të tjerë, ishte zgjeruar edhe më tej gjatë vitit të kaluar. /Telegrafi/