SHBA e kënaqur që më shumë gra në Kosovë kanë pozita të larta politike

Nën kujdesin e Presidentes Osmani, filloi sot konferenca dyditore që shënon dhjetë vite nga themelimi i Javës së Gruas, organizuar nga Instituti Kombëtar Demokratik (NDI), më mbështetjen e Agjencisë Amerikane për Zhvillim Ndërkombëtar (USAID).

Ambasadori i SHBA në fjalën e tij ka përshëndetur avancimin e pozitës së gruas në Kosovë.

Ai ka thënë se demokracia gjithëpërfshirëse ka shumë rëndësi për Shtetet e Bashkuara.

“Unë kam një besim të thellë se pjesëmarrja e plotë e grave në jetën publike është themelore për të ndërtuar dhe mbështetur një demokraci të gjallë, përfshirëse”, përcjell Telegrafi.

“Kosova ka bërë progres për të rritur numrin e grave udhëheqëse në politikë”, deklaroi Hovenier duke falënderuar krerët shtetërore dhe drejtuesit e opozitës që ishin në panel.

Ambasadori i SHBA në Kosova ka shprehur kënaqësinë që Kosova ka zgjedhur gruan e dytë në krye të vendit si dhe dy zëvendëskryeministre.

“Jemi po ashtu shumë të lumtur që 60% e grave garuese kanë arritur të zgjidhen përfaqësuese pa pasur nevojë për kuotë”, deklaroi ndër të tjera Jeffrey Hovenier./Telegrafi/