SHBA dhe Kina arrijnë marrëveshje për pezullim tremujor të tarifave tregtare

Presidenti i Shteteve të Bashkuara të Amerikës, Donald Trump dhe homologu i tij kinez, Xi Jinping, kanë rënë dakord të mos aplikojnë tarifat e reja tregtare për 90 ditë, kohë gjatë të cilës do të mbahen bisedime.

Në një takim të nivelit të lartë gjatë samitit të G20-ës në Buenos Aires, Trump mori përsipër të mos rrisë tarifat e mallrave kineze nga 10 për qind në 25 për qind më 1 janar 2019.

Nga ana tjetër, Kina do të blejë një sasi shumë të konsiderueshme të produkteve bujqësore, industriale dhe energjetike, tha Shtëpia e Bardhë në një deklaratë.

Ndërkohë, Pekini thotë se të dy palët ranë dakord të hapin tregjet e tyre. Ky ishte takimi i parë ballë për ballë midis dy liderëve, që nga shpërthimi i një lufte tregtare më parë këtë vit.

Mosmarrëveshja shpërtheu pasi Trump u ankua se Kina nuk po bënte asgjë për të ulur suficitin e saj të madh në tregtinë dypalëshe.

Në samitin në kryeqytetin e Argjentinës, më parë të shtunën, udhëheqësit e G20 ranë dakord për një deklaratë të përbashkët që vë në dukje ndarjet mbi tregtinë, por nuk kritikon proteksionizmin. /Telegrafi/