Selimi thotë se pandemia COVID-19 ka ndikuar edhe në qasjen fizike në drejtësi

Ministri i Drejtësisë, Selim Selimi, sot ka marrë pjesë në Forumin Ministror ndërmjet Bashkimit Evropian dhe Ballkanit Perëndimor për punë të drejtësisë të kryesuar nga Ministrja e Drejtësisë dhe Mbrojtjes së Konsumatorëve së Republikës Federale të Gjermanisë, Christine Lambrecht.

Në këtë forum, është diskutuar për ndikimin e pandemisë COVID-19 në sistemin e drejtësisë dhe të drejtat themelore, përdorimi i teknologjisë së komunikimit në distancë (video-konferencë) dhe qasja në drejtësi në epokën digjitale, si dhe sundimi i ligjit dhe reformat gjyqësore.

Gjatë këtij forumi, Selimi tha se pandemia COVID-19, ka ndikuar edhe në qasjen fizike në drejtësi por sipas tij, është siguruar që masat e ndërmarra nga institucionet e Kosovës të mos sjellin kufizime dhe bllokim të punës në sistemin e drejtësisë.

Njëra nga këto masa sipas Selimit është mbajtja e seancave gjyqësore duke përdorur teknologjitë e komunikimit në distancë, të cilën e kanë praktikuar edhe disa prej gjykatave në Kosovë, thuhet në njoftimin e MD-së.