Sateliti më i madh privat turk dërgohet në hapësirë

Sateliti më i madh i prodhuar ndonjëherë nga një kompani private turke, FGN-100-d1, u lëshua me sukses në hapësirë. Ky satelit u zhvillua nga kompania Fergani Space, drejtuar nga Selçuk Bayraktar, dhëndri i presidentit të Turqisë.

Sateliti FGN-100-d1, i cili u krijua në mënyrë tërësisht vendase nga Fergani Space, u lëshua nga baza hapësinore Vandenberg në Shtetet e Bashkuara të Amerikës.

Ky lëshim i suksesshëm shënon një hap të rëndësishëm të parë për Fergani Space drejt realizimit të projektit të një konstelacioni satelitësh për pozicionim.

Pesha e satelitit është 102 kilogramë, duke e bërë atë satelitin më të madh të prodhuar nga një kompani private turke. Pas futjes në orbitë, ai filloi menjëherë misionin e tij duke dërguar të dhëna telemetrie.

Drejtori i përgjithshëm i Fergani Space, Selçuk Bayraktar, së bashku me ekipin e tij, ndoqën me kujdes procesin e lëshimit dhe vendosjes në orbitë nga Qendra Kombëtare e Teknologjisë, Ozdemir Bayraktar në Stamboll.

“Projekti i Fergani Space, që e nisëm në vitin 2022, po rritet me një ekip prej 106 anëtarësh. Sot kemi vendosur satelitin tonë të parë në orbitë. Satelitët tanë do të shërbejnë si një konstelacion në orbitën e ulët të Tokës për pozicionim dhe komunikim. Ky projekt është realizuar me burimet tona”, tha Bayraktar.

Ai shtoi se gjatë pesë viteve të ardhshme planifikojnë të lëshojnë 100 satelitë, për të krijuar një sistem global të pozicionimit të quajtur Ulug Bey.

Selçuk Bayraktar gjithashtu njoftoi se po zhvillojnë një raketë mbartëse me kapacitet 50 tonë, e aftë të dërgojë ngarkesa deri në 1.5 ton në orbitë. “Kjo arritje është një dhuratë për vendin dhe kombin tonë. Përgëzoj dhe falënderoj nga zemra të gjithë ata që kanë punuar pa u lodhur për këtë projekt”, shtoi ai.

FGN-100-d1 do të funksionojë në orbitën e ulët të Tokës (LEO) në një lartësi prej rreth 510 kilometrash, duke ndjekur një orbitë sinkrone me Diellin (SSO). Me një shpejtësi prej 7.6 km/s, ai do të përfundojë rreth 15 orbita rreth Tokës çdo ditë.

I pajisur me një kompjuter fluturimi me tre sisteme rezervë, sateliti synon testimin e suksesshëm të operacioneve orbitale, telemetrisë dhe komunikimit, si dhe aftësive për pozicionim dhe komunikim të ngarkesës së dobishme.

Gjatë zhvillimit, inxhinierët e Fergani Space përfunduan me sukses:

avionikën kritike,
integrimin e softuerit vendas,
teknologjinë e gjelbër të shtytjes,
dizajnin strukturor dhe
testimin e mjedisit.

Ky projekt pritet të nxisë ekosistemin turk të hapësirës dhe teknologjitë hapësinore. /Telegrafi/