Sarri: Nuk kam folur ende me Ronaldon, Dybala po e bën dallimin

Maurizio Sarri e ka komentuar fitoren e Juventusit (1-0) ndaj Atletico Madridit, në ndeshjen e xhiros së pestë të fazës grupore të Ligës së Kampionëve.

“Kemi shpenzuar shumë energji këtë mbrëmje, gjë që është e pashmangshme në Ligën e Kampionëve. Mendoj se luajtëm shumë mirë, por njësoj si në ndeshjen ndaj Atalantas në fundjavë, u desh të luftonim shumë për të arritur te fitorja”.

Lexo po ashtu Juve mposht Atleticon dhe siguron vendin e parë në Grupin D

“Mendoj se kemi më shumë motivim në Ligën e Kampionëve, por është gabim, sepse duhet ta luajmë të njëjtin stil futbolli në të gjitha garat”, ka deklaruar Sarri për Sky Sport Italia.

Padyshim se trajneri është pyetur edhe për situatën e Cristiano Ronaldos, ndërsa ka thënë se akoma nuk ka biseduar me të për gjendjen e tij.

“Nuk kam folur me të akoma për dhimbjen në gju, por ai dukej në formë të mirë, pasi që në fazat finale po kthehej prapa, angazhohej shumë dhe ndihmonte në mbrojtje”.

“Dybala është i klasit botëror, është në një periudhë shumë pozitive të formës, prandaj aktualisht po e bën dallimin”, ka shtuar trajneri i Juves. /Telegrafi/