Sadiku prezantohet te Malaga me numrin 9-të, premton gola

Armando Sadikun është prezantuar te Malaga, pas kalimit të tij në këtë klub në formë huazimi nga Levante.

Sulmuesi kuqezi deklaroi se skuadra e ka pritur mirë dhe lojtarët duan të luajnë.

“Unë jam sulmues dhe më pëlqen të luaj në zonë, të shënoj gola dhe të ndihmoj ekipin”.

“E kam parë skuadrën mirë në dhomën e zhveshjes. Gjithçka duket në rregull, lojtarët thjesht mendojnë për të luajtur.”

Sadiku tha se ka biseduar me Keidi Baren para se të merrte vendimin.

“Fola me Keidin para se të vija këtu dhe më tha se kemi një ekip të mirë. Ai më tha se na mungon diçka në sulm. Kjo më ka motivuar më shumë dhe tani është koha për të punuar e shënuar gola për Málagan”.

“Të gjithë më kanë folur shumë mirë për këtë ekip, që gjithmonë ka luajtur në La Liga dhe ka infrastrukturë shumë të mirë”.

“ Këtu kanë luajtur sulmues mjaft të mirë, ndaj është nder për mua të kem mundësinë të luajtur në Malaga. Sot kam zhvilluar stërvitjen time të tretë, trajneri është një njeri shumë pozitiv dhe më ka shpjeguar mënyrën sesi do të luajmë”.

“Jam shumë i kënaqur, pasi më kanë pritur shumë mirë”, ka thënë Sadiku në prezantim. /Telegrafi/