Rusia u përpoq të shkatërronte sistemin Patriot në Ukrainë me raketë hipersonike, por e pësoi shumë më keq

Rusia u përpoq të shkatërronte në Ukrainë një sistem të mbrojtjes ajrore Patriot të prodhuar nga SHBA-ja me një raketë hipersonike, thanë dy zyrtarë amerikanë për CNN.

Siç raportohet, Rusia u përpoq ta shkatërronte atë javën e kaluar, transmeton Telegrafi.

Sulmi dështoi dhe ushtria ukrainase në vend të kësaj e shkatërroi raketën duke përdorur sistemin Patriot, thanë zyrtarët, duke shënuar kështu përdorimin e tyre të parë të suksesshëm të sistemit të avancuar të mbrojtjes ajrore vetëm disa javë pasi mbërriti në vend.

Lexo po ashtu Ukraina rrëzoi raketën ruse hipersonike me sistemin amerikan Patriot, Putini pati thënë se nuk do të mund të rrëzohej me asnjë sistem mbrojtës

Mbrojtësit ajror ukrainas lëshuan disa raketa nga sistemi Patriot në kënde të ndryshme për të goditur raketën ruse, duke treguar se sa shpejt janë bërë të aftë në përdorimin e sistemit të fuqishëm, tha një zyrtar.

Zyrtarët amerikanë besojnë se rusët morën sinjalet që lëshohen nga Patriot, duke i lejuar ata të vënë në cak sistemin duke përdorur raketën hipersonike, të njohur si Kinzhal.

Sistemi i raketave Patriot ka një radar të fuqishëm për të detektuar objektivat në ardhje në rreze të gjatë, duke e bërë atë një platformë të fuqishme të mbrojtjes ajrore të aftë për të goditur raketa balistike dhe më shumë. Por emetimi i radarit i nevojshëm për të dalluar kërcënimet në distancë gjithashtu bën të mundur që pala kundërshtare të zbulojë baterinë Patriot dhe të kuptojë vendndodhjen e saj. /Telegrafi/