Rusia miraton ligjin që dënon me burg sportistët që rezultojnë pozitiv në doping

Rusia ka miratuar një ligj të ri, sipas të cilit parashikohet përgjegjësi penale për sportistët që përdorin doping dhe dënim me gjobë deri në rreth 14.700 euro.

Sipas Anadolu Agency, ligji i ri i miratuar në parlamentin rus parasheh që sportistët në Rusi të cilët do të përdorin doping mund të dënohen me burg, por aty specifikohet që mund të ketë edhe gjobë në të holla e cila mund të shkoj deri në një milion rubla ruse apo 14.700 euro.

Ligji i ri vjen me qëllim të forcimit të sistemit anti-doping në Rusi, i cili viteve të fundit ka shënuar skandale të shumta me dopingun, teksa ky sistem synon të përshtatet edhe me standardet e Agjencisë Botërore Anti-Doping (WADA).

Në raportin e publikuar në këtë vit nga WADA, thuhet se sportistët rusë në mënyrë sistematike marrin doping, dhe kërkoi të pamundësohet pjesëmarrja e sportistëve rusë në Lojërat Olimpike në Rio 2016.

Gjithashtu, Komiteti Olimpik Ndërkombëtar (IOC) në mesin e 389 sportistëve rusë, lejoi pjesëmarrjen e 271 sportistëve në Lojërat Olimpike në Rio, ndërkohë që Komiteti Paraolimpik (IPC) nuk ka lejuar pjesëmarrjen e asnjë sportisti rus në Lojërat Olimpike. /Telegrafi/