Rusia ka ndryshuar synimet në Ukrainë

“Objektivat gjeografike” të Rusisë në Ukrainë kanë ndryshuar duke përfshirë jo vetëm republikat popullore separatiste Donetsk dhe Luhansk në Ukrainën lindore, por edhe një numër rajonesh të tjera, tha ministri i Jashtëm, Sergey Lavrov.

“Tani gjeografia (jonë) është e ndryshme. Nuk janë vetëm DNR dhe LNR, është gjithashtu rajoni Kherson, Zaporizhzhia dhe një sërë territoresh të tjera”, tha ai në një intervistë me agjencinë shtetërore të lajmeve RIA Novosti.

Lavrov e lidhi ndryshimin e qëllimeve me dorëzimin perëndimor të armëve në Kiev. Ai tha se Rusia nuk mund të pranojë që “në pjesët e Ukrainës që do të kontrollojë Zelensky ose kushdo që do ta zëvendësojë, ka armë që do të përbëjnë një kërcënim të drejtpërdrejtë për territorin tonë dhe territorin e atyre republikave që kanë shpallur pavarësinë e tyre”.

“Nëse vendet perëndimore furnizojnë Ukrainën me armë me rreze të gjatë, (këto synime) do të shkojnë edhe më tej”, tha Lavrov, raporton aljazeera.

Në muajin e kaluar, shpërndarja e sistemeve raketore me rreze të mesme veprimi HIMARS i ka lejuar Ukrainës të sulmojë pozicionet ruse përtej vijës së frontit më shpesh dhe me saktësi më të madhe.

Ekspertët thonë se komentet janë sinjali më i madh ende se Moska po kërkon të vazhdojë aneksimin e territoreve jugore dhe lindore të Ukrainës që kapi në pushtimin e saj pesë-mujor.

Rusia më parë i zhvendosi objektivat në Ukrainë për t’u fokusuar në lindje të vendit në muajin prill pas një përpjekjeje të dështuar për të sulmuar kryeqytetin Kiev. /Telegrafi/