Rukiqi: Serbia në Kosovë nuk e ka interes veriun, manastiret e Ujmanin, por synim e ka tregun

Kryetari i Odës ekonomike të Kosovës (OEK), Berat Rukiqi ka kërkuar që të vendoset taksë energjetike për produktet e Serbisë, pasi sipas tij vetëm dëmet në veri për Kosovën brenda një viti mund të shkojnë deri në 30 milionë.

Rukiqi ka thënë se Serbia nuk e ka interes veriun, as manastiret, as Ujmanin, por synon tregun e Kosovës.

“Serbia adutin kryesor në Kosovë, nuk e ka as veriun, as manastiret, as Ujmanin. Serbia adutin kryesor në Kosovë e ka tregun. Aplikimi i një takse të tillë, nuk do duhej të kundërshtohej nga asnjë akter ndërkombëtar, pasi që nga moszbatimi i saj ndikohen të gjithë (problemi me orët digjitale në Evropë, investimi gjerman në interkoneksion, interesi amerikan në Termocentralin ‘Kosova e Re'”, ka shkruar Rukqi në profilin e tij në Facebook, shkruan Telegrafi.

Postimi i plotë i kryetarit të OEK-ut, Berat Rukiqi

“Po dëgjohen konstatime, që të Serbia nuk po “dhez” asnjë lloj presioni, qoftë nga Komisioni Evropian, State Department apo Berlini, për zbatim të Marrëveshjes për Energjinë. Në anën tjetër, dëmet direkte për Kosovën janë 25 – 30 milionë euro në vit, për veriun, plus shumë miliona tjera nga dëmet indirekte, pa përfshirë pamundësinë e vënies në funksion të interkoneksionit me Shqipërinë.

Unë besoj që ka mekanizëm që mund ta detyrojë Serbinë të zbatojë këtë marrëveshje ose të paguaj në mënyrë indirekte për dëmet që po i shkakton nga moszbatimi i kësaj marrëveshje. Një e ashtuquajtur “taksë për energjinë” që do t’i vendosej produkteve serbe, p.sh në normën 10%, do të na siguronte në buxhet rreth 45 milionë euro, në baza vjetore, mjaftueshëm për të kompensuar një pjesë të dëmeve dhe i njëjti mekanizëm do të rriste presionin nga brenda, që potencialisht do ta detyronte Serbinë të filloj zbatimin e kësaj marrëveshje.

Serbia adutin kryesor në Kosovë, nuk e ka as veriun, as manastiret, as Ujmanin. Serbia adutin kryesor në Kosovë e ka tregun. Aplikimi i një takse të tillë, nuk do duhej të kundërshtohej nga asnjë akter ndërkombëtar, pasi që nga moszbatimi i saj ndikohen të gjithë (problemi me orët digjitale në Evropë, investimi gjerman në interkoneksion, interesi amerikan në Termocentralin “Kosova e Re”, etj)”. /Telegrafi/