Rezultatet fantastike të Ballkanit në garat evropiane në stadiumin ‘Fadil Vokrri”

Ballkani nuk di për humbje, por as edhe për gol të pranuar në stadiumin “Fadil Vokrri”, pasi në “shtëpinë e tyre të re”, kampioni i Kosovës ka arkëtuar tri fitore në garat evropiane të edicionit të sivjetmë.

Kampioni i Kosovës po vazhdon me paraqitje të mira në garat evropiane dhe është afër kalojë në fazën “Play-Off” për të siguruar një vend në grupet e Ligës së Konferencës.

Ballkani arriti të enjten mbrëma të shënoj fitoren e radhës, duke shkuar në një seri prej tri fitoreve radhazi këtë sezon në Evropë dhe përveç kësaj, therandasit nuk kanë pranuar asnjë gol, shkruan Telegrafi.

Lexo po ashtu Ballkani ndez motorët në pjesën e dytë, me dy super gola merr fitore ndaj Lincoln Red Imps

Ekipi i Ilir Dajës kësaj radhe mposhti Lincoln Red Imps me rezultat 2-0 në ndeshjen e parë të vlefshme për raundin e tretë të Ligës së Konferencës.

Golat në këtë takim për kampionin e Kosovës u shënuan nga Meriton Korenica në minutën e 59-të dhe Lorenc Trashi, i cili shënoi në minutën e 62-të.

Në raundin e dytë, Ballkani gjithashtu shënoi fitore pa pranuar gol, duke e mposhtur Larnen me rezultat të pastër 3-0.

Në këtë fitore, golat u shënuan nga Albion Rrahmani (26’) nga penalltia, Almir Kryeziu në minutën e 33-të dhe Nazmi Gripshi (67’).

Ballkani mori fitore të madhe edhe në raundin e parë para-kualifikues të Ligës së Kampionëve ndaj Ludogoretsit, edhe pse u eliminua pas humbjes në ndeshjen e dytë si mysafirë.

“Portokall e zinjtë” befasuan gjiganti bullgar në ndeshjen e parë duke i mposhtur 2-0 me golat e Korenicës (45+) dhe Qëndrim Zybës (55’).

Kështu, Ballkani sikur është familjarizuar me stadiumin “Fadil Vokrri” duke u bërë “shtëpinë e tyre të re”, pas tri fitoreve pa pranuar gol, edhe përkundër kushteve të vështira shkaku i terrenit të rënduar në kohën e fundit.

Pas ndeshjes, për këtë ka folur edhe mesfushori nga Shqipëria, Nazmi Gripshi, i cili ka lavdëruar ekipin për paraqitje, edhe pse shtoi se u penalizuan nga gjendja e fushës, që duket e rënduar pas aktiviteteve të shumta muajt e fundit.

“Në pjesën e parë kishim pak probleme, fusha na penalizoi në ndërtimin e lojës. Në pjesën e dytë kemi ndryshuar mënyrën e lojës dhe shënuam dy gola”, ka thënë Gripshi pas ndeshjes. /Telegrafi/