Reshje rekord të shiut në Seul të Koresë së Jugut, të paktën tetë të vdekur – pamje që tregojnë kaosin e krijuar

Të paktën tetë persona gjetën vdekjen në Seul të hënën pasi shirat rekord përmbytën shtëpitë, rrugët dhe stacionet e metrosë në kryeqytetin e Koresë së Jugut, duke ndërprerë energjinë dhe duke detyruar qindra njerëz të evakuohen, sipas autoriteteve.

Sipas mediave të huaja, përcjell Telegrafi, Ministria e Brendshme dhe për Siguri e Koresë së Jugut tha se tre nga ata që vdiqën ishin bllokuar në një gjysmëbodrum të përmbytur.

Nëntë të tjerë u lënduan dhe të paktën shtatë persona mbeten të zhdukur, tha ministria.

Që nga mesnata e së hënës me orën lokale, pjesë të Seulit panë gjithsej 422 milimetra shi, duke i shtyrë autoritetet të ngrenë alarmin më të lartë të nivelit 3 të emergjencës.

Qyteti regjistroi 141.5 milimetra shi në orë – shkalla më e lartë që kur autoritetet filluan të mbanin të dhëna.

Ndërkohë pamjet nga i gjithë qyteti tregojnë përmbytje të rënda, me njerëz që kalojnë nëpër rrugë deri në kofshët e tyre në ujë.

Megjithëse niveli i ujërave kishte rënë kryesisht nga mëngjesi i së martës, makinat dhe autobusët mbetën “të shpërndarë” nëpër rrugë dhe trotuare, duke bllokuar trafikun e mëngjesit.

Ai vuri në dukje gjithashtu nevojën e rishikimit të sistemit të menaxhimit të fatkeqësive në vend, pasi moti ekstrem pritet të bëhet gjithnjë e më i zakonshëm për shkak të krizës klimatike.

Shumë vende në të gjithë Azinë Lindore po përjetojnë tani reshje më intensive ditore ndërsa “Toka ngrohet”, sipas Panelit Ndërqeveritar për Ndryshimet Klimatike.

Pjesë të Japonisë gjithashtu panë rrebeshe të hënën mbrëma, me disa rajone të Hokkaido-s që raportuan përmbytje – por jo të lënduar që nga e marta.

Megjithatë, autoritetet kanë paralajmëruar rrezikun e përmbytjeve dhe rrëshqitjeve të dheut. /Telegrafi/