Rekordmeni i Zvicrës, Alexander Frei në mbrojtje të shqiptarëve: Jam krenar me Xhakën e Shaqirin, tani është koha e shqiptarëve në Zvicër

Në Zvicër vazhdon të jetë tema e momentin festimi i golave nga Granit Xhaka dhe Xherdan Shaqiri.

Dy futbollistët tanë kanë gjunjëzuar serbët me dy golat e tyre duke i dhënë Zvicrës fitoren e parë në Kupën e Botës.

Por festimi i tyre me shqiponje ka ngjallur reagime të mëdha në tërë botën, pasi serbët si gjithmonë që viktimizohen kanë quar ankesë në FIFA për t’i dënuar djemtë tanë.

E së fundmi në mbrojtje të Xherdanit e Granitit ka dalë edhe legjenda e Zvicrës, Alexander Frei.

Ish-sulmuesi i famshëm i Kombëtares së Zvicrës i cili është edhe golashënuesi më i mirë në histori me 42 gola ka folur për rastin e shqiponjës.

“Natyrisht që nuk ishte veprimi më i mençur në Kupën e Botës, por nuk ka qenë ndonjë gabim festimi i tyre. Unë jam krenar me ata dy djem që luajnë për Zvicrën”, ka thënë fillimisht Frei.

Frei ka deklaruar se e rëndësishme është që Xhaka, Shaqiri dhe të tjerët japin maksimumin në fushë dhe nuk ka fare rëndësi nëse nuk e këndojnë himnin.

“Shaqiri dhe Xhaka kanë cilësi të jashtëzakonshme. Ata rregullisht dhurojnë spektakël në fushë duke dhënë maksimumin. Kjo është më e rëndësishme se sa këndimi i himnit.”, vazhdoi tutje Frei.

38-vjeçari ka thënë se tani është koha e shqiptarëve në Zvicër pasi më parë ishte e turqve dhe italianëve.

“Po i krahasoj gjeneratat në Kombëtare ndër vite. Në vitet e tetëdhjeta lojtarët kishin emra si Sulser, Egli, Burgener ose Hermann. Më pas, në vitet nëntëdhjetë, turqit erdhën me lojtarët si Turkilmaz apo edhe italianët me Sforzan por edhe afrikanët me Nkuffo. Përsëri ishte një gjeneratë e turqve me vëllezërit Yakin”, tha Frei.

Tutje ish-sulmuesi i Borussia Dortmund deklaroi se tani është koha e shqiptarëve.

“Tani shumë lojtarë me prejardhje shqiptare janë në Kombëtare. Është koha e shqiptarëve në ekipin tonë kombëtar”.

“Është shumë normale dhe krejtësisht logjike që kanë ndjenja për dy vendet”, tha Frei.

Krejt në fund Frei tha se shqiptarët janë integruar plotësisht në shtetin zviceran por që është gjë normale që ata jetojnë me traditat e tyre. /Telegrafi/