Regjistrimi i bujqësisë, defekte të vogla të një procesi të madh

Bujqësia kosovare pritet të fitojë shumë nga procesi i regjistrimit të saj, që përfundoi më 20 nëntor, me gjithë që mënyra si u realizua ky projekt, mori edhe kritika jo të mira.

Kësi përfundimi u nxor në një debat që iu kushtua këtij procesi, në emisionin “Ekonomia me Erëzën”, në Klan Kosova.

Shefi i divizionit për statistika të Bujqësisë dhe Mjedisit në Agjencinë e Statistikave, Haki Kurti tha se procesi ka pasur disa telashe në ditët e para, por në përgjithësi u bë në harmoni me praktikat më të mira të regjistrimit.
Ai tha se rezultatet preliminare, që do të dalin në shkurt të vitit ardhshëm, do të jenë pasqyrë e punës që është bërë.

Profesori i bujqësisë, Imer Rusinovci, që njehërit është edhe udhëheqës i divizionit për Bujqësi në AAK, kritikoi mos përfshirjen në regjistrim të katër komunave me shumicë serbe të veriut të Kosovës por edhe mungesën e fushatave që do të vetëdijesonin qytetarët.

Këto, sipas tij, rrezikojnë të sjellin rezultate të kontestuara në sektorin e bujqësisë.

Sidoqoftë, Rusinovci shtoi se ky regjistrim është shumë i nevojshëm, sidomos kur dihet se një i tillë nuk është bërë që nga viti 1960.

Edhe kryetari i Shoqatës Sindikale të Bujqve, TahirTahiri kontestoi rezultatet që mund të dalin nga ky regjistrim, duke pretenduar se qytetarët kanë hezituar t’i japin të dhënat e sakta, pasi organizatorët e këtij projekti nuk i kanë informuar ata për qëllimin e regjistrimit. Ai tha se jo pak njerëz kanë hezituar të japin të dhëna të sakta për pronat e tyre ngase janë frikësuar për shtim tëtatimeve.

Halmi Gjergjizi, njohës i fushës së agrobiznesit tha se regjistrimi që zgjati nga 1 deri më 20 nëntor, ka rëndësi strategjike për të ardhmen e sektorit të bujqësisë. Të dhënat që do të dalin, sipas tij, përveç që do të ndihmojnë në ndarjen e subvencioneve, do të shfrytëzohen edhe për hartimin e politikave bujqësore.

Ky regjistrim është i pari që bëhet në vend, paslufte, dhe i dyti nga viti i largët 1960. Rezultatet përfundimtare pritet të publikohen në shtator 2015.

Regjistrimi i ardhshëm i bujqësisë do të bëhet në vitin 2024. /Telegrafi/