Reeker-Dimitrov: Maqedonia e Veriut dhe SHBA-të nisin etapë të re në marrëdhëniet si aleatë në NATO

Zëvendës sekretari shtetëror i SHBA-ve për Evropë dhe Euro-Azi, Philip Reeker në takimin me ministrin e Punëve të Jashtme, Nikolla Dimitrov, tha se Republika e Maqedonisë së Veriut dhe SHBA-të nisin etapë të re në marrëdhëniet e ndërsjella dhe bashkëpunim si aleatë në aleancë.

Siç njoftoi Ministria e Punëve të Jashtme, Reeker ka cekur domosdoshmërinë e vazhdimit të reformave për të përforcuar kapacitetin e përgjithshëm në vend, duke përfshirë këtu fushën e drejtësisë dhe luftën kundër korrupsionit, njofton Telegrafi Maqedoni.

Dimitrov tha se vizita e Reeker po ndodh në një moment të rëndësishëm për vendin tonë dhe vetëm një ditë pas miratimit të djeshëm të Protokollit për anëtarësimin e vendit tonë në NATO nga ana e Komitetit për Punë të Jashtme pranë Senatit amerikan.

Lexo po ashtu Reeker me porosi për opozitën maqedonase: S’keni kohë për lojëra politike

“Përkrahja e SHBA-ve në integrimet euroatlantike të Maqedonisë së Veriut ishte dhe mbetet thelbësore në arritjen e stabilitetit, demokratizimit të mëtejshëm dhe prosperitetit të vendit dhe të rajonit”, ka thënë Dimitrov.

Bashkëbiseduesit kanë vlerësuar marrëdhëniet bilaterale si të forta dhe miqësore, të bazuara në partneritet strategjik dhe bashkëpunim në më shumë fusha./Telegrafi/