Reagon legjenda e Hungarisë pas skenave rrëqethëse ku mbeti pa ndjenja në ndeshjen ndaj Holandës

Legjenda e Hungarisë dhe trajneri Adam Szalai, i cili pësoi atak kardiak në ndeshjen ndaj Holandës, ka dhuruar një përditësim pozitiv nga spitali.

Ndeshja e cila u zhvillua në Amsterdam përfundoi me rezultat të thellë 4-0 në favor të Holandës, teksa kjo sfidë ishte ndërprerë për më shumë se 10 minuta pas një urgjence mjekësore.

Gjyqtari Jesus Gil Manzano sinjalizoi për ndaljen e ndeshjes pasi trajnerit Szalai iu përkeqësua papritmas gjendja, me dëshmitarët që thanë se kishte pësuar një krizë.

Lojtarët dhe stafi i të dyja kombëtareve mbetën të shokuar nga kjo situatë, veçanërisht ylli i Liverpoolit dhe kapiteni i Hungarisë, Dominik Szoboszlai, i cili u pa në lot.

Lexo po ashtu Skena rrëqethëse në Holandë: Legjenda e Hungarisë pati atak kardiak, por u shpëtua falë intervenimit të shpejtë

Szalai tashmë ka dhuruar një përditësim pozitiv të gjendjes së tij nga spitali ku po trajtohet, duke lehtësuar të gjithë tifozët e futbollit.

“Faleminderit për kaq shumë mesazhe, unë jam mirë”, ishte mesazhi i shkurtër i Szalai në rrjetet sociale.

Pas rifillimit të ndeshjes, Federata Hungareze e Futbollit përmes një njoftimi zyrtar kishte bërë me dije se është përmirësuar gjendja e Szalai dhe se ai është i vetëdijshëm./Telegrafi/