Raportimet për vrasjen e Faton Hajrizit, MPJD kërkon nga Serbia që të konfirmojnë identitetin e personit të vrarë

Mediat në Serbi kanë raportuar sot se kanë vrarë Faton Hajrizin, i cili ditë më parë ishte arratisur nga burgu i Smrekonicës në Kosovë.

Lidhur me raportimet ka reaguar edhe Ministria e Punëve të Jashtme dhe Diasporës, të cilët kanë kërkuar nga autoritetet serbe që të konfirmojnë identitetin e personit të vrarë, transmeton Telegrafi.

“Të nderuar, Ministria e Punëve të Jashtme dhe Diasporës, Zyra Ndërlidhëse e Republikës së Kosovës në Serbi pas raportimeve për vrasjen e një shtetasi të Republikës së Kosovës në Serbi, ka kërkuar nga Autoritetet serbe që të konfirmojnë identitetin e personit të vrarë”, thuhet në reagim.

Lexo po ashtu Mediat serbe publikojnë detaje të reja rreth vrasjes së Faton Hajrizit në Serbi

Sipas mediave në Serbi, Faton Hajrizi nuk ka pranuar të dorëzohej dhe ka qëlluar disa herë me armë në drejtim të policëve që e rrethuan atë në afërsi të Loznicës.

Gjithashtu mediat serbe kanë publikuar disa fotografi të Hajrizit, i cili duket i shtrirë dhe pranë tij kishte një armë.

Kujtojmë se një polic u vra ndërsa një tjetër u plagos rëndë nga të shtënat që ndodhën natën e 18 korrikut në Loznicë, ku i dyshuar për vrasje ishte Faton Hajrizi./Telegrafi/