Raport: Android është më stabil se iOS

Nuk është risi të thuhet se Android 2.3 Gingerbread ka qenë versioni më jostabil i sistemit operativ Android, kur bëhet fjalë për dështimin e aplikacioneve mobile, përkatësisht ndërperjen e funksionimit të tyre në gjysmë dhe pa dëshirën e përdoruesit.

Dhe këtë pohim e rikonfirmon raporti i ri i publikuar nga Crittercism, kompania e cila e monitoron përdorimin e më shumë se një miliard aplikacioneve mobile në Android dhe iOS.

Mirëpo, i njëjti raport thotë se tani stabiliteti i aplikacioneve në Android e tejkalon atë të iOS, në të gjitha versionet.

Sipas raportit thuhet se aplikacionet e Android Gingerbread kanë dështuar në punë në mesatarisht 1.7 për qind të kohës, ndërsa në versionet e reja të platformës mobile të Google, si Ice Cream Sandwich, Jelly Bean dhe KitKat, kjo mesatare është ulur në 0.7 për qind.

Për krahasim, iOS 6 ka regjistruar një normë shumë më të lartë të dështimit me 2.5 për qind të kohës, iOS 7 e ka ulur këtë shifër në 2.1 për qind, ndërsa iOS 7.1 i ka përmirësuar edhe më shumë shifrat, duke i zbritur në 1.6 për qind.

Edhe me përmirësimet e reja të sjella në versionet e reja të iOS, përqindja e dështimeve të aplikacioneve në pajisjiet e Apple është pothuajse dy herë më e lartë sesa ajo e Android, duke e bërë këtë të fundit sistemin operativ më stabil. / Telegrafi /