Qorolli i reagon LDK-së: Nëse s’dini me i fitu zgjedhjet, me çfarë legjitimiteti mendoni me qeverisë?

Zëvendësministri i Drejtësisë, Vigan Qorrolli, ka kritikuar Lidhjen Demokratike të Kosovës.

Qorrolli thotë se nënkryetarët e LDK-së, nëpër studio televizive po bëjnë deklarata rreth formimit të qeverisë, duke cituar një deklaratë të tyre” S’po mundemi me i fitu zgjedhjet, ama qeverinë mujna me e ba.”

Sipas Qorrollit, kjo s’është strategji politike, kjo është filozofi e humbësit.

“Pra, LDK përmes shumë nënkryetarëve të saj që po ngarendin studio’m’studio, po na thotë që vota e qytetarëve s’paska rëndësi fare, mjafton pak pazare, ca pazarlleqe prapa perdeve dhe hop… qeveria në dorë! Po nëse s’dini me i fitu zgjedhjet, me çfarë legjitimiteti mendoni me qeverisë? Me hajmali, me short apo me ndonjë thirrje nga qielli? Pra, qytetari s’qenka i rëndësishëm, mjafton të rregullohen hesapet në prapaskenë dhe pushteti vjen vetë. Kjo është një fantashkencë politike”, ka pohuar ai.

Mes tjerash, ai ka shkruar se “Populli flet në zgjedhje, kush s’din me i fitu, le t’i përvesh mëngët e të mësojë prej humbjes”.

“Se qeveria nuk fitohet në korridoret e kafehaneve të Prishtinës, por në zemrën e qytetarit. E nëse s’ta jep qytetari, s’ta jep as pazari”./Telegrafi/