Qeveria i kundërpërgjigjet BE-së: Raportin 48 faqesh për Banjskën e kemi dërguar vitin e kaluar

Zëdhënësi i Bashkimit Europian, Peter Stano, ka thënë se Kosova ende nuk e ka ndarë me BE-në raportin përfundimtar për hetimet e sulmit terrorist në Banjskë, por zëdhënësi i Qeverisë së Kosovës, Përparim Kryeziu i është kundëpërgjigjur atij duke thënë se Qeveria ka përpiluar një raport prej 48 faqësh në lidhje me sulmin terrorist të cilin ia kanë dërguar BE-së dhe shteteve anëtare qysh vitin e kaluar.

Kryeziu theksoi se nëse Stano e ka fjalën për raportin që duhet të përgatitet nga prokuroria e vendit, sipas Kryeziut, duhet të kërkohet përgjigje nga vetë ai institucion i drejtësisë.

“Si Qeveri e Republikës së Kosovës, brenda kompetencave tona, kemi përpiluar një raport 48-faqësh në lidhje me sulmin terrorist dhe paramilitar, të cilin ia kemi dorëzuar Bashkimit Europian dhe secilit shtet anëtarë qysh vitin e kaluar. Këtë informacion besoj që zëdhënësi Stano duhet ta ketë. Nëse ai në deklaratat e tij të vazhdueshme e ka fjalën për raportin që duhet të përgatitet nga prokuroria e vendit, atëherë kjo është një çështje për të cilën duhet të kërkojmë përgjigje nga vetë ky institucion”, është shprehur Kryeziu, për Telegrafin.

Ai tha se është shqetësuese që nëntë muaj pas sulmit në Banjskë nuk ka aktakuzë nga Prokuroria e Kosovës por as masa nga unioni europian dhe bashkësia ndërkombëtare për Serbinë.

Kryeziu vlerëson se Radoiçiq mbetet “i lirë dhe rrezik potencial i vazhdueshëm për sigurinë dhe paqen në rajon”.

“Për ne, mbetet tejet shqetësuese dhe e pakuptimtë që edhe pas 9 muajve, në njërën anë nuk ka aktakuzë nga prokuroria e vendit për Millan Radoiçiq dhe në anën tjetër bashkësia ndërkombëtare, përfshirë Bashkimin Europian, nuk ka ndërmarrë masa ndaj Serbisë, përkundër fakteve që dëshmojnë përfshirjen e saj në sulmin e 24 shtatorit të vitit 2023. Rikujtojmë që Radoiçiq vazhdon të mbetet i lirë dhe rrezik potencial i vazhdueshëm për sigurinë dhe paqen në rajon”, ka deklaruar Kryeziu.

Ndryshe, zëdhënësi i BE-së, Stano, ka ripërsëritur se Kosova është përgjegjëse për hetimet e sulmit terrorist që ndodhi në Banjskë më 24.09.20223, ku mbeti i vrarë rreshteri i Policisë së Kosovës, Afrim Bunjaku.

Lexo po ashtu Sulmi në Banjskë, Stano: Nga Kosova nuk kemi marrë një raport të hetimeve

Në një konferencë për media, ai tha se hetimet duhet të bëhen nga autoritetet e Kosovës pasi rasti ka ndodhur brenda territorit të saj, teksa shtoi se ende nuk është ndarë me BE-në raporti final i hetimeve të plota.

“Kur bëhet fjalë për hetimet, para së gjithash ato duhet të bëhen nga autoritetet e Kosovës, nëse i referoheni incidentit në Banjskë, më 24 shtator të vitit të kaluar. Pra kjo është një gjë që ka ndodhur në territorin e Kosovës dhe autoritetet e Kosovës janë përgjegjëse për të hetuar, për të ofruar dhe për të ndarë raportin final të hetimeve të plota. Kjo ende nuk ka ndodhur dhe ne nuk mund të procedojmë pa i pasur rezultatet e këtyre hetimeve”, ka deklaruar Stano.

Më 24 shtator 2023, një grup terrorist i udhëhequr nga Millan Radojçiq e vranë rreshterin e Policisë së Kosovës Afrim Bunjaku.

Në përleshjen e armatosur që pasoi, u neutralizuan edhe tre terroristë serbë.

Kurti tha, atëkohë, se dialogu për normalizimin e marrëdhënieve me Serbinë nuk mund të vazhdojë, sikur nuk ka ndodhur asgjë në Banjskë.

Ani pse janë disa të arrestuar për sulmin në Banjskë, ende nuk ka aktakuzë të ngritur.

Një e tillë pritet edhe ndaj ish-nënkryetarit të Listës Serbe, Millan Radoiçiq.

Ai kishte pranuar publikisht organizimin e sulmit, megjithatë vazhdon të jetë i lirë në Serbi pasi është larguar nga Kosova pas sulmit. /Telegrafi/