Qeveria miraton propozimet për ndryshimin e Ligjit për Zgjedhjet – ia procedon Kuvendit

Qeveria ka miratuar ndryshimet në Ligjin për zgjedhjet e përgjithshme.

Kryeministri Albin Kurti, tha se ndryshimet në këtë ligj janë në funksion të garantimit të drejtës së votës për të gjithë qytetarët e Kosovës.

Tutje theksoi se me të iu mundësohet qytetarëve që jetojnë jashtë vendit, të mund të votojnë në ambasadat dhe konsullatat që Kosova ka nëpër botë.

“Ky projektligj nuk është i ri, ai është një gjë që është iniciuar edhe në Legjislaturën e gjashtë, ka vazhduar edhe në legjislaturën e shtatë ku është përkrahur miratimi i tij dhe tani ne po e miratojmë ne Qeveri për ta proceduar më tej në Kuvend. Është garantues për të drejtën e votës për të gjithë qytetarët dhe e mundëson votimin e diasporës në ambasada dhe konsullata të Kosovës”, ka thënë Kurti.

Ndryshimet në Ligjin për zgjedhjet e përgjithshme tani i procedohen Kuvendit të Kosovës, ku pritet të mbahet seancë plenare.

Lexo po ashtu PDK nuk pajtohet me ndryshimin e shpejt të Ligjit për zgjedhjet, dalin nga mbledhja e Kryesisë së Kuvendit

Ky ligj vjen në kuvend para mbajtjes së seancës për zgjedhjen e presidentit të ri të vendit dhe nga partitë opozitare, është cilësuar si shantazh.

Lidhja Demokratike e Kosovës e ka vlerësuar nismën për ndryshimin e Ligjit të zgjedhjeve si “shantazh” nga LVV-ja.

“LDK e vlerëson të ngutshëm dhe shantazhues veprimin e sotëm për ta sjellë në votim pa një dakordim paraprak, pa në diskutim adekuat dhe pa një debat të gjerë, njërin ndër ligjet më të rëndësishme në Republikën e Kosovës”, thuhet në reagimin e kësaj partie.

Lexo po ashtu Edhe AAK kundër shqyrtimit dhe miratimit të Projektligjit për zgjedhjet

Kundër ndryshimit të Ligjit për zgjedhjet e përgjithshme është shprehur edhe Aleanca për Ardhmërinë e Kosovës.

Shefi i Grupit Parlamentar të AAK-së, Besnik Tahiri tha se ata do ta kundështojnë të njëjtin edhe gjatë senacës.

“Vetëm në sisteme totalitare, në sisteme ku ka deficite serioze të demokracisë, nxirret për amendamentin dhe ndryshim një ligj i cili rregullon të drejtën themelore për të qenë të zgjedhur dhe për të zgjedhur. Është e papranueshme për ne që në rrethana ku ky ligj nuk është absolutisht prioritet, të ballafaqohet kuvendi dhe partitë politike me një ndryshim të tillë”, tha Tahiri.

Lexo po ashtu Reagon edhe LDK: Me kërkesën për ndryshimin e Ligjit për Zgjedhje, pushteti po shantazhon

Po ashtu nënkryetari i Kuvendit të Kosovës nga PDK-ja, Bedri Hamza, tha se partia e tij nuk pajtohet që kjo çështje kaq e rëndësishme të trajtohet në këtë mënyrë dhe urgjencë.

“Ne e kuptojmë rëndësinë e reformës zgjedhore. Ka nevojë për përmirësime në këtë fushë, por ne e dhamë mendimin që nuk pajtohemi që kjo çështje kaq e rëndësishme të trajtohet në këtë mënyrë dhe urgjencë”, u shpreh ai, njofton Telegrafi.