Punimet në Shatërvan prekin bizneset, opozita propozon mbështetjen e tyre

Nisma e grupit të kuvendarëve të Lëvizjes Vetëvendosje në Prizren për përkrahjen e bizneseve për shkak të punimeve në infrastrukturë në Qendrën Historike është shtyrë për shqyrtim në seancat e radhës të Kuvendit të Prizrenit. Kjo ide në parim është përkrahur, por zyrtarët e Ekzekutivit kanë kërkuar që kërkesa të precizohet në aspektin juridik në mënyrë që mos të kthehet prapa nga niveli qendror.

Kuvendari Ilir Gashi (LVV), në seancën e fundit të Kuvendit të Komunës së Prizrenit, ka propozuar që në rend të ditës të futet pika në lidhje me subvencionimin e bizneseve të dëmtuara nga punimet në Qendrën Historike të Prizrenit.

“Subvencionimi i bizneseve që veprojnë brenda Qendrës Historike të qytetit duhet të përfshijë në vete: faljen e borxhit të taksave komunale për shfrytëzimin e hapësirës publike për 6 muajt e kaluar si dhe lirimin po nga taksat e njëjta për 6 muajt e ardhshëm; lirimin nga pagesa e qirasë nga muaji mars deri në dhjetor për bizneset që shfrytëzojnë me qira lokalet komunale në qendrën historike të Prizrenit; dhe kompensimin e një pjese të humbjes së bizneseve gjatë periudhës së zhvillimit të punimeve duke llogaritur diferencën në mes të hyrave të deklaruara në periudhën e njëjtë të vitit të kaluar me të hyrat e deklaruara gjatë muajve sa po zhvillohen punimet në Qendrën Historike të Prizrenit”, ka thënë Gashi.

Kuvendari Haziz Hodaj (LDK) ka vlerësuar si interesante këtë kërkesë, meqë sipas tij bizneset kanë pengesa, sidomos në sezonin kur qyteti më së shumti frekuentohet nga vizitorët, ndërkohë që nuk dihet se sa do të zgjasin punimet.

Drejtori i Shërbimeve Publike, Çelë Lamaj ka pohuar se punimet kanë nisur pak muaj më parë dhe se në sheshin kryesor janë shtruar mbi 500 metra kanalizim, ujësjellës e kanalizim të ujërave atmosferikë, që janë punime që kërkojnë kohë. Sipas tij, janë zhvilluar edhe diskutimet lidhur me futjen e kabllove në gypa nëntokësorë dhe se në diskutim ka mbetur çështja e vendosjes së ormanëve të orëmatësve elektrikë.

“Kemi pas disa takime me palët dhe jemi përafruar deri në marrjen e pëlqimit. Por nuk janë ndërprerë punimet në Shatërvan”, është shprehur Lamaj.

Ndërkaq, gjatë shqyrtimit të pikës së propozuar nga LVV-ja opozitare, nënkryetari i Komunës, Kujtim Gashi ka theksuar se ka vullnet politik për ta shtyrë përpara këtë kërkesë, por se paraprakisht nevojitet një analizë para vendimmarrjes. “Pa e qartësuar bazën juridike, vendimi mund të kthehet. Prandaj konsideroj se ky vendim duhet të shtyhet për seancën tjetër”, ka thënë Gashi.

Edhe kuvendari Karanfil Haxhillari (LVV) është pajtuar që propozuesi dhe zyrtarët ligjorë ta përpilojnë kërkesën në mënyrë të duhur dhe si pikë e rendit të ditës të shqyrtohet në seancën e radhës.

Kryesuesja e Kuvendit, Antigona Berisha Bytyqi ka theksuar se nuk ka kuorum për vendimmarrje prandaj dhe çështja duhet të shtyhet për seancën e radhës.

Një muaj më parë, OJQ “EC Ma Ndryshe” ka publikuar rezultatet e një mini-ankete me përfaqësuesit e 33 bizneseve në zonën historike, në bazë të cilave komuniteti i biznesit është shprehur i pakënaqur me dinamikën e punimeve të deritanishme, teksa kanë konfirmuar se përballen edhe me efekte negative në veprimtarinë e tyre.

Rekomandimi kryesor i bizneseve për autoritetet e pushtetit lokal ka qenë që punimet në këtë zonë të kryhen para sezonit veror, të ketë koordinim më të madh mes punëkryesve, sikurse edhe mbikëqyrje më të madhe nga organet komunale.

Punimet në sheshin e Shatërvanit në Prizren kanë filluar më 6 mars të këtij viti dhe kostoja e këtij projekti kap vlerën prej 3 milionë eurove derisa punimet parashihet të realizohen brenda afatit tre vjeçar. /Telegrafi/