Punëtorët sezonal kërkohen edhe në Maqedoni, paga ditore deri 1000 denarë

Në Maqedoni kërkohen punëtorë sezonal për mbledhjen e mollëve, rrushit dhe frutave tjera në rajonin e Prespës, Resnjës, Berovës, Kavadarit, ndërsa mëditja është prej 700 deri 1000 denarë.

Në rajonin e Resnjës dhe Prespës do të nevojiten më shumë se një mijë mbledhës të mollëve këtë vjeshtë, edhe pse në tre lokacione janë dëmtuar frutat nga moti i ligë, përcjell Telegrafi Maqedoni.

“Në Prespë mbledhja fillon më 27 shtator, ndërsa përfundon më 1 nëntor, do të thotë se zgjat përafërsisht katër ose pesë javë. Punëtorët sezonal fitojnë nga 800, 900 deri 1 mijë denarë. Kemi njerëz nga Maqedonia Lindore, por vijnë edhe nga Shqipëria”, tha për Faktor, Ljube Pampulevski – kryetar i Shoqatës së kultuvesve të frutave “Bllagoj Kotllarovski” nga Resnja.

Edhe në Berovë prodhuesit po mundohen të gjejnë punëtorë sezonal.

“Po kërkohen shumë punëtorë, ndërsa i gjejmë shumë vështirë, por nuk kemi zgjidhje. I paguajmë sipas kilogramëve që kanë mbledhur, ndërsa kemi punëtorë që mbledhin deri 100 kilogram. Punëtorët i gjejmë nga qyteti, por edhe nga fshatrat”, tha Mirjana Dudukovska nga Berova.

Përndryshe, edhe në Maqedoni paraqitet nevoja për punëtorët sezonal, ndërsa vërehet se të rinjtë janë të painteresuar për të punuar./Telegrafi/