Publikohen pamjet e para të Nord Stream, tri javë pasi u shkatërrua ‘me forcë ekstreme’ – duke u ‘varrosur’ nën shtratin e detit

Janë shfaqur ato që thuhet se janë pamjet e para të jashtëzakonshme të një gazsjellësi të prishur Nord Stream, tri javë pasi u hodh në erë ‘me forcë ekstreme’ në një akt të dyshuar sabotimi.

Sipas mediave të huaja, përcjell Telegrafi, pamjet, të publikuara nga Suedia të martën, treguan se të paktën 50 metra të gazsjellësit Nord Stream 1 u shkatërruan ose u “varrosën” nën shtratin e detit, pas një shpërthimi më 26 shtator – i supozuar nga shumë se ishte një sulm rus.

Publikimi i imazheve erdhi pasi policia daneze tha se “shpërthime të fuqishme” fshiheshin pas dëmtimeve të dy tubacioneve të gazit (Rrjedha e Veriut 1 dhe 2) në pjesën daneze të Detit Baltik, sipas hetimeve të tyre paraprake.

Dy tubacionet Nord Stream u dëmtuan nga shpërthimet nën Detin Baltik në fund të shtatorit, duke shkaktuar katër rrjedhje.

Ndërsa rrjedhjet ishin në ujërat ndërkombëtare, dy prej tyre ishin në zonën ekskluzive ekonomike daneze dhe dy prej tyre në atë suedeze.

Më 6 tetor, hetuesit suedezë thanë se hetimet e tyre fillestare kishin arritur në një përfundim të ngjashëm.

Tubacionet, të cilat lidhin Rusinë me Gjermaninë, kanë qenë në qendër të tensioneve gjeopolitike pasi Rusia ndërpreu furnizimin me gaz në Evropë si hakmarrje kundër sanksioneve perëndimore për pushtimin e Ukrainës nga Moska.

Edhe pse tubacionet nuk ishin në funksion, ato përmbanin gaz përpara se të bëheshin viktimë e sabotimit të dukshëm.

Dhe akuzat janë drejtuar në drejtim të Rusisë, kompania shtetërore e energjisë e së cilës Gazprom është pronari kryesor i tubacioneve.

Kremlini, megjithatë, i ka quajtur akuzat e tilla ‘marrëzi’ dhe ka fajësuar Shtetet e Bashkuara për dëmin. /Telegrafi/