Që pas marrjes së Chelsea nga Clearlake Capital, strategjia e transferimeve ka qenë e çrregullt, dhe duket se kjo vazhdon me largimin e mundshëm të Noni Madueke. Sulmuesi anësor ka rënë dakord për kushtet personale me Arsenalin, vetëm një vit e gjysmë pasi iu bashkua “Bluve” për 29 milionë funte.
Madueke ishte një nga lojtarët më të përdorur të Chelseat në sezonin 2024/25, duke shënuar 17 gola dhe dhënë 8 asiste në 86 paraqitje. Megjithatë, Chelsea duket se po e shet atë për arsye financiare, duke i dhënë një nga rivalëve të qytetit një lojtar me potencial të madh.
Në total, Chelsea ka shpenzuar afër 2 miliardë dollarë për transferime që nga ndryshimi i pronësisë, por suksesi në fushë ka qenë i kufizuar. Vetëm tani klubi po i afrohet rikthimit në majat e futbollit evropian, me kualifikimin për Ligën e Kampionëve.
Edhe pse 23-vjeçari nuk ka qenë gjithmonë i qëndrueshëm, ai ende është në fazë zhvillimi dhe larg potencialit të tij të plotë. Arsenali po përfiton nga ky fakt, duke blerë një lojtar me përvojë në Premier League dhe ende me shumë për të dhënë.
Statistikat e Madueke tregojnë për një lojtar që ka nevojë për përmirësim: saktësia në goditje është 56.6% dhe përqindja e konvertimit të tyre vetëm 10.6%. Në pasime, me 1442 të tentuara, ai mbetet larg mesfushorëve si Enzo Fernández apo Caicedo.
Nga ana tjetër, Madueke ka bërë 180 rikuperime topi, që tregon për përkushtim në detyrat mbrojtëse, por me vetëm 56 ndërhyrje, ai duhet të përmirësohet në duelet fizike – një aspekt që Arteta do ta kërkojë në mënyrë të veçantë.
Në aspektin taktik, ai mund të shërbejë si zëvendësues i Bukayo Saka-s ose të luajë në krahun tjetër, duke i dhënë Arsenalit fleksibilitet sulmues. Shkathtësia e tij e bën të përshtatshëm për një skuadër që kërkon mbajtje dhe qarkullim të shpejtë të topit.
Nëse ai përmirëson vendimmarrjen dhe rrit kontributin në gola, Madueke mund të bëhet një nga blerjet më të mira të Arsenalit – dhe një tjetër largim që Chelsea mund të pendohet, sidomos nëse vendimi është marrë më shumë për bilancin financiar sesa për cilësinë në fushë. /Telegrafi/
