Protesta kundër ambasadës amerikane në Jerusalem, raportohet për 28 të vrarë – dita më e përgjakshme që nga viti 2014 (Foto/Video,+18)

Forcat izraelite kanë vrarë 28 palestinezë dhe plagosën të paktën 500 persona në Gaza, thanë zyrtarët e shëndetësisë, ndërsa trupat qëlluan plumba ndaj banorëve që u mblodhën kundër hapjes së ambasadës së SHBA në Jerusalem.

Siç shkruan The Guardian, përcjell Telegrafi, dhjetëra mijëra njerëz dolën në vende në të gjithë enklavën bregdetare në atë që ishte dita më e përgjakshme në Gaza që nga lufta e vitit 2014.

Siç thuhet më tej, banorët injoruan paralajmërimet nga ushtria izraelite se palestinezët do të rrezikonin jetën e tyre duke marrë pjesë.

Gjithashtu bëhet e ditur se afër dyzet persona u plagosën rëndë dhe të vdekurit përfshinin një djalë 14-vjeçar, thanë zyrtarët e shëndetësisë palestineze.

Qielli përgjatë kufirit ishte i mbushur me tym të zi ndërsa protestuesit ndiznin goma.

U dëgjuan të shtëna të pandërprera të snajperëve dhe turma e protestuesve u panë duke ikur në drejtim të gardhit.

Përleshjet dhe protestat, me pasojë vdekjen e disa personave kanë ardhur përpara hapjes së ambasadës amerikane në Jerusalem, të paralajmëruar nga presidenti amerikan, Donald Trump.

Dhe siç shkruan tutje The Guardian, ndërsa ambulancat dërgonin të plagosurit në spitale, përgatitjet ishin duke u zhvilluar në Jerusalem për ceremoninë.

“Një ditë e madhe për Izraelin”, shkruajti Trump herët të hënën. /Telegrafi/