Plagosja e dyfishtë në Fushë Kosovë, Prokuroria jep detaje

Të shtunën janë plagosur dy gra nga arma e zjarrit në rrugën “Besa Besë”, në Fushë Kosovë, ndërsa i dyshuari, i njohur për policinë është arratisur. 

Zëdhënësja e Prokurorisë Themelore në Prishtinë Laureta Ulaj ka bërë të ditur për Telegrafin se mbi të dyshuarin për plagosjen rëndojnë veprat “Vrasje e rëndë në tentativë” dhe “Armëmbajtje pa leje”.

“Ju njoftojmë se me të pranuar informatën, prokurori kujdestar nga Departamenti i Krimeve të Rënda ka dalë në vendin e ngjarjes me njësite e tjera relevante, ku sipas informatave fillestare mund t’ju njoftojmë se nga të shtënat me arme zjarri nga një i dyshuar, janë plagosur dy femra të cilat janë dërguar në QKUK për trajtim mjekësor. Me urdhër të Prokurorit të Shtetit rasti është iniciuar në drejtim të veprave penale ‘Vrasje e rëndë në tentativë’ dhe ‘Armëmbajtje pa leje’, thuhet në njoftim.

Tutje, bëhet e ditur se janë duke punuar ngushtë me policinë rreth ndriçimit të plotë të rastit.

Lexo po ashtu https://telegrafi.com/plagosja-e-dy-grave-ne-fushe-kosove-dyshuari-ne-arrati/

“Ne koordinim me Policinë janë duke u ndërmarrë të gjitha veprimet e nevojshme hetimore me qëllim të sigurimit të prezencës së të dyshuarit në procedure penale, si dhe për t’i ndriçuar të gjitha rrethanat e këtij rasti”, ka thënë Ulaj.

Edhe nga Policia e Kosovës kanë bërë të ditur se se hetuesit policor në koordinim me prokurorinë, po ndërmarrin veprimet hetimore për arrestimin e personit të dyshuar (i cili është identifikuar) si dhe në ndriçimin e plotë të rastit. /Telegrafi/