Prizreni pasurohet me Kompleksin Memorial të “Drinit”

Prizreni do të pasurohet me Kompleksin Memorial të komandantit të UÇK-së, Ekrem Rexha –“Drini”.

Komuna ka shpallur konkurs publik për ekzekutimin e punimeve të tij.

Drejtori i Administratës së Prizrenit, Osman Hajdari, tregon se Kompleksi Memorial, do të ndërtohet para “Shtëpisë së Bardhë”.

“Drejtoria e Administratës në Komunën e Prizrenit ka shpallur shpall tenderin publik për ekzekutimin e punimeve të ndërtimit të Memorialit kushtuar heroit Ekrem Rexha-Drini, i cili do të ndërtohet në hapësirën e parkut përballë hyrjes së ‘Shtëpisë së Bardhë’”,  tha ai për prizrenipress.

Komandanti i UÇK-së Ekrem Rexha -‘Drini’ u vra para shtëpisë së tij në lagjen “Bazhdarhane” në rrethana misterioze, në mëngjesin e 8 majit të vitit 2000, në kohën kur po punonte si drejtor komunal për Emergjencë. Në momentin kritik ai kishte dalë të ndezte veturën për të shkuar në punë, ndërsa ishte qëlluar me armë automatike, derisa po shikonte gomën e parë të veturës, nga ana e shoferit që ishte shpuar qëllimisht.

Për zbardhjen e vrasjes, nën drejtimin e ndërkombëtarëve në Prizren janë mbajtur dy procese gjyqësore, por në mungesë provash, të akuzuarit, ish-pjesëtarë të UÇK-së, por edhe ish-shokë të “Drinit”, janë liruar.

Procesi për të zbardhur vrasjen më vonë u zhvendos në Prishtinë, ku në një proces tjetër me drejtësinë u përball ish-komandanti i Zonës së Dytë të TMK-së, gjeneral Sali Veseli, që ishte akuzuar për bashkëpunim në vrasje. Shkalla e dytë e Gjykatës e pat prishur aktgjykimin e Gjykatës në Prizren, siç është thënë në mungesë provash liroi të akuzuarit.