Presidenca reagon sërish: Duhet koordinim brenda institucioneve shtetërore për anëtarësim në KiE, por edhe me aleatët

Presidenca e Kosovës, ka vazhduar përplasjet në distancë me Qeverinë e Kosovës.

Në një reagim për Telegrafin, këshilltari për media i presidentes Vjosa Osmani, Bekim Kupina, ka thënë se Qeveria dhe MPJD nuk kanë treguar koordinim e bashkëpunim me Presidenten.

Sipas tyre kjo nuk e ndihmon Kosovën.

Në prononcim theksohet se Presidentja po vazhdon angazhimin që sa më parë të mbahet një seancë për anëtarësim të Kosovës në KiE.

Lexo po ashtu Presidenca: Letra e Qeverisë dërguar në KiE, nuk është konsultuar dhe dakorduar me Presidenten Osmani

“Konkretizimi i zotimeve të 22 marsit 2024 (e jo të prillit, siç thuhet nga MPJD-ja) mund të bëhet vetëm pas pajtimit në mes të tre krerëve të institucioneve, gjë që nuk ka ndodhur. Veprime të tilla janë kundër frymës së bashkëpunimit ndërinstitucional dhe nuk e ndihmojnë Kosovën. Prandaj në mënyrë që Kosova të ecë suksesshëm drejt KiE, është me rëndësi që veprimet shtetërore të koordinohen paraprakisht edhe brenda institucioneve, por edhe me aleatët të cilët po e përkrahin anëtarësimin e Kosovës. Siç e potencova edhe më herët, Presidentja po vazhdon angazhimin që sa më parë të mbahet një seancë për anëtarësim të Kosovës në KiE”, ka thënë Kupina.