Policia në Ferizaj: Të pakompromis ndaj atyre që shkaktojnë zjarre

Policia e Kosovës për rajonin e Ferizajt u kanë bërë thirrje qytetarëve që të kenë kujdes dhe të mos i djegin hapësirat fushore.

Policia në një komunikatë për media thekson se do të jetë e pakompromis ndaj atyre që përhapin zjarre.

“Policia rajonale e Ferizajt ka marrë masat e nevojshme dhe ka angazhuar personel të mjaftueshëm në menaxhimin e rasteve të zjarreve në rajonin të Ferizajt. Policia Rajonale e Ferizajt po angazhohet me përkushtim në parandalimin e zjarreve, duke koordinuar aktivitetet me institucionet lokale dhe agjencionet tjera përkatëse.

Aktualisht në rajonin e Ferizajt nuk kemi asnjë vatër, apo lokalitet të përfshirë nga zjarret, por policia apelon tek qytetarët të kenë kujdes në përhapjen e zjarreve, të mos i djegin hapësirat fushore dhe pyjet”, thuhet në njoftim.

Policia thekson se do të jetë e pakompromis ndaj të gjithë atyre që më qëllim shkaktojnë zjarrëvënie, gjersa bën të ditur se do të ndjekë penalisht të gjithë personat/individët që shkaktojnë zjarrvënie të qëllimshme, apo si pasojë e neglizhencës së tyre ndodhin zjarret.

“Falënderojmë qytetarët për bashkëpunimin që kanë me policinë dhe ftojmë qytetarët që sa herë kanë informacione rreth atyre personave që me dashje shkaktojnë zjarrëvënie të lajmërojnë policinë, stacionin më të afërt, apo përmes aplikacionit digjital ‘Lajmëro Policinë’ dhe në numrat kujdestarë: 192, 0290/326-250 dhe 0290/322-406. Policia do të reagojë menjëherë dhe se të dhënat e juaja do të ruhen në konfidencialitet të plotë”, thuhet në njoftim. /Telegrafi/