Policia heton vdekjen e 52-vjeçares në Viti, mjeku: Erdhi pa shenja jete

Një grua 52-vjeçare ka arritur e vdekur në një ordinancë private në Viti. Kështu së paku pretendon mjeku që e pranoi i pari.

Pas shqetësimeve shëndetësore që kishte pasur, një grua që i përkiste komunitetit rom ka arritur e vdekur në Ordinancën “Medikus” në Viti, të shtunën.

Kjo qendër mjekësore është më e afërta me fshatin Vërbovc, i cili njëherit është fshati ku e ndjera banonte.

Doktori që është edhe pronari i kësaj ordinance, Rrahim Avdiu për Tv Dukagjinin ka thënë se 52 vjeçarja kishte shkuar pa shenja jete në ordinancën e tij.

Lexo po ashtu Gjendet e vdekur një grua në një ordinancë private në Viti

“Pacientja, kur jam afruar te ajo, ka qenë pa shenje jete. Megjithëse familjarët kërkonin ta ngjallja por unë nuk mund ta ngjallë njeriun e vdekur edhe i kam dhënë adrenalinë. Ka vuajtur prej diabetit, hernisë abdominale, bronhit kronik e yndyrës. Shumicën e terapisë e ka marrë nga spitalet serbe”, ka deklaruar Rrahim Avdiu.

E ndjera ishte trajtuar herë pas here në këtë klinikë dhe para saj, në klinika serbe.

Lidhur me rastin, nga Qendra e Mjekësisë Familjare në Viti nuk kanë dhënë detaje.

Sipas raportit të Policisë, vdekja e saj u konstatua në Emergjencë ndërsa trupi më pas ishte dërguar për obduksion.

Të afërmit e 52 vjeçares nuk kanë dashur që të prononcohet për televizionin, ndërkaq ajo u varros në varrezat e fshatit Vërbovc, të dielën.