A po ndikojnë rastet e pazbuluara në përhapjen e shpejtë të coronavirusit në Evropë?

Rastet e buta ‘asimptomatike’ të coronavirusit ishin nxitëse të përhapjes së shpejtë  të coronavirusit në Wuhan të Kinës, thonë studiuesit në Shkollën e Shëndetit Publik të Mailman në Universitetin Columbia.

Sipas mediave të huaja, përcjell Telegrafi, në shumë vende evropiane, testet laboratorike janë të rezervuara për rastet e dyshuara nga virusi, si dhe për punonjësit e shëndetit me simptoma të rënda.

Megjithëse Bashkimi Evropian mbylli kufijtë e saj, dhe shumë vende janë vendosur në bllokim, Organizata Botërore e Shëndetësisë, i ka shtyrë qeveritë të testojnë çdo rast të mundshëm të dyshuar.

“Nuk mund ta luftojmë zjarrin symbyllur, dhe të njejtën kohë nuk mund ta luftojmë këtë pandemi, nëse nuk e dimë se kush është i infektuar”, tha Dr. Tedros Adhanom Ghebreyesus, drejtori i përgjithshëm i OBSH-së.

Para bllokimit të 23 janarit në Wuhan, 86 për qind e infeksioneve të coronavirusit, ishin të padokumentuara, thanë studiuesit në Shkollën Mailman të Columbia në një studim të botuar në Science.

“Shpërthimi i rasteve të COVID-19 në Kinë u inicua kryesisht nga individë me simptoma të buta, të kufizuara ose të pazbuluara”, tha bashkëautori Jeffrey Shaman, profesor i shkencave të shëndetit mjedisor në Shkollën Mailman të Shëndetit Publik të Universitetit Columbia.

Infeksione të buta ose asimptomatike mund të kapin një pjesë të madhe të popullatës, shpjegojnë autorët e studimit.

Lothar Wieler, kreu i “Robert Koch Institute” në Gjermani, tha se vetëm gjysma e të infektuarve shfaqin simptoma të virusit.

Ndërkaq ekspertët e shëndetit publik në Shkollën Mailman thonë se epidemia ndryshoi kur Kina filloi zbatimin e masave të kontrollit, duke përfshirë kufizimet e udhëtimit, vetë karantinën dhe testimin e shpejtë./Telegrafi/