Plagosja në Shtërpcë, avokati i Kurtajt kundërshton arrestin shtëpiak: Klienti im ka vepruar në vetëmbrojtje

Gjykata Themelore në Ferizaj ka vendosur që t’ia zëvendësojë masën e sigurisë ushtarit të FSK-së, Azem Kurtaj, i cili dyshohet për plagosjen e dy të rinjve serbë. Nga paraburgimi ai është dërguar në arrest shtëpiak.

Avokati i Kurtajt, Kujtim Kërveshi, në një reagim në Facebook ka deklaruar se mbrojtja nuk pajtohet me gjetjet e prokurorisë e as me vendimin e gjykatës për masën e zëvendësuar, megjithatë ka thënë se i respekton ato.

Ai gjithashtu ka theksuar se “përballjen do ta kërkoj vetëm pranë institucioneve dhe rrugëve ligjore duke besuar në drejtësi dhe sundim të ligjit!”.

Lexo po ashtu Dërgohet në arrest shtëpiak pjesëtari i FSK-së, i dyshuar për plagosjen e dy të rinjve serbë

“Azem Kurtaj sonte e bën gjumin pranë familjes së tij! Masa e paraburgimit është zëvendësuar me masën e arrestit shtëpiak. Azemi është deklaruar i pa fajshëm pas leximit të aktakuzës. Mbrojtja e Azemit megjithëse nuk pajtohet me gjetjet e prokurorisë si në aktakuzë as me vendimin e gjykatës për masën e zëvendësuar, respekton ato dhe përballjen do ta kërkoj vetëm pranë institucioneve dhe rrugëve ligjore duke besuar në drejtësi dhe sundim të ligjit!”, ka shkruar Kërveshi.

Avokati tutje ka thënë se klienti i tij ka vepruar në vetëmbrojtje dhe se nuk bëhet fjalë për vrasje të rëndë në tentativë.

“Mbrojtja pa paragjykim të vendimit përfundimtar të gjykatës beson dhe angazhohet profesionalisht se ky proces do ta vërtetoj teorinë e mbrojtjes, ajo është se Azemi ka vepruar në vetëmbrojtje dhe siç ka besuar mbrojtja se nuk ka pasur vrasje të rëndë të mbetur në tentativë, mbrojtja vazhdon të beson dhe angazhohet për një proces të drejtë dhe të pavarur e i cili do ta vërtetoj pafajësinë e Azemit!”, ka shkruar tutje Kërveshi.

Në fund, ai ka thënë se ata që e paragjykojnë Kurtajn, e stigmatizojnë atë, dhe/ose i japin kontekst etnik rastit në fjalë, i japin epitetet të cilat nuk i ka dhënë gjykata me vendim të formës së prerë, do të përballen me drejtësinë.

“Republika e Kosovës nuk është vend që mbështetet mbi ca kristale të brishta që mund t’i thyej kush të dojë, sa herë të dojë, ky vend ka rregulla, është sovran, ka identitet dhe institucione!”, ka përfunduar avokati Kërveshi.

Azem Kurtaj, ish-pjesëtar i FSK-së, akuzohet se më 6 janar ka plagosur dy të rinj serbë, një 11 dhe një 21-vjeçar, në fshatin Gotovushë të Shtërpcës.

Sipas aktakuzës, i pandehuri me dashje, me përdorim të armës, ka shkaktuar rrezik të madh për jetën dhe trupin e njerëzve, në atë mënyrë që përderisa ka qenë duke drejtuar veturën e tij në drejtim të Brezovicës, me të arritur në fshatin Gotovushë, ka hasur në një grup të qytetarëve të cilin e kishin penguar, ia kishin pamundësuar lëvizjen e lirë të automjetit derisa të rinjtë e komunitetit serb ishin duke festuar. /Telegrafi/