Peterle: Nuk mund të thuhet se Maqedonia ka dalur tërësisht nga kriza

Eurodeputeti slloven dhe kryetar i delegacionit të PE-së për Maqedoni, Alojz Peterle, në bisedë për RTVM foli për gjendjen aktuale në Maqedoni, me porosi drejtuar liderëve politik të Maqedonisë të ndajnë ambicie të njëjtë evropiane dhe se dëshiron që politika e Maqedonisë të demonstrojë unitet për rrugën e Maqedonisë drejt BE-së.

Eurodeputeti slloven dhe bashkëkryesues i Komitetit të përzier parlamentar Maqedoni-BE, që duhet së shpejti të mbajë takim, thotë se shpreson se do të përmbushen të gjitha kushtet për mbajtjen e tij, përcjell Telegrafi Maqedoni.

Lidhur me gjendjen politike në vend, Peterle thotë se ka stabilizim të dukshëm të të njëjtës, por vështirë është të thuhet nëse Maqedonia ka dalë tërësisht nga kriza.

“Shumë gjëra u ndryshuan, shpresa është se Maqedonia do të nisë përpara dhe se problemet e hapura do të fillojnë të zgjidhen”, thotë Peterle.

Në pyetjen nëse e tërë kjo do të kontribuojë që Maqedonia të nisë më shpejt në proceset e eurointegrimeve, Peterle vlerëson se kjo varet nga vetë shteti, me çfarë dinamike do të përparojë.

“Maqedonia para dhjetë viteve ishte vendi-kandidat i përgatitur më së miri. Nuk dua të flas shumë për data, madje edhe kur flitej për Slloveninë, unë çdoherë thoja – kur do të jetë e gatshme Sllovenia, duhet të jetë e gatshme edhe BE-ja. Ia dëshiroj këtë edhe Maqedonisë. Në atë kuptim Maqedonia garon me veten e saj, ndërkaq sa i përket çështjes së emrit nga disa politikanë dhe profesionistë të ndryshëm, dëgjova sinjale të cilat e përforcojnë optimizmin se atmosfera do të përmirësohet dhe se gjërat do të marrin kahje tjetër. Do të thotë nuk jam i vetmi që shpreson se pas hapave të parë megjithatë do të vihet deri te zgjidhja që do ta ndihmojë Maqedoninë”, tha ai.

Për idenë për takim të partive politike të Maqedonisë me përfaqësues të Parlamentit Evropian dhe BE-së në afërsi të Parisit, në shtëpinë e Zhan Monesë, eurodeputeti slloven theksoi se kjo është mundësi që politikanët të afrohen dhe të takohen me praktikën dhe me idetë nga vetë fillimi i Unionit./Telegrafi/